चितवन । चितवनको इच्छाकामना गाउँपालिका–२ स्थित कोटारीमा २ घरमा आगलागी भएको छ ।
जङ्गलमा लागेको डढेलोका कारण घरमा आगो सल्किँदा स्थानीयको २ घरमा क्षति पुगेको हो । मङ्गलबार साँझ ७ बजेतिर जङ्गलमा लागेको आगो स्थानीयको घरसम्म आइपुग्दा १ घर पूर्णरुपमा नष्ट भएको छभने अर्को १ घरको आधा भाग जलेको स्थानीय अनिल बुढाथोकीले जानकारी दिए ।
स्थानीयले आगो नियन्त्रणमा लिएपछि अन्य घर आगलागीबाट बचेको उनले बताए । आगलागीमा परी स्थानीय रामबहादुर चेपाङको घर पूरै जलेको र रु २० हजार नगद, २० डोको मकै, ४ घार मौरी, लत्ताकपडालगायत सामग्री जलेर पूर्ण रुपमा नष्ट भएको स्थानीय अनिल बुढाथोकीले बताए ।
उनका अनुसार चेपाङका छोरा कर्ण चेपाङको घर आधा जलेको र घरमा रहेको १ घार मौरी, लत्ताकपडालगायत जलेर नष्ट भएका छन् ।