काठमाडौँ । वैदेशिक रोजगार विभाग अन्तर्गत ईपीएस कार्यालयले यही वैशाख ९ गतेदेखि १५ गतेसम्म सञ्चालित दोस्रो चरणको सीप परीक्षण (स्किल टेष्ट) को नतिजा सार्वजनिक गरेको छ ।
रोजगार अनुमति प्रणाली (ईपीएस) अन्तगर्त उत्पादनमूलक क्षेत्रको दोस्रो चरणको सीप परीक्षणको नतिजा सार्वजनिक गरिएको हो । दोस्रो चरणको लागि छनोट भएका ६ हजार ३२१ जनामध्ये ५ हजार ७५३ जना पास भएको ईपीएस कोरिया शाखाले जनाएको छ ।
दोस्रो चरणका लागि छनोट भएका ४९८ जना फेल भएका र ७० जना परीक्षामै सहभागी नभएको ईपीएस कार्यालयले जनाएको छ । सीप परीक्षणमा उत्तिर्ण भएका व्यक्तिहरुको दक्षिण कोरियामा ईपीएस अन्तर्गत रोष्टर सूचीकृत प्रकृयाको लागि स्वास्थ्य परीक्षण र रोजगार आवेदन फाराम (जब एप्लिकेशन फाराम) दर्ता गरिने कार्यालयले जनाएको छ ।
उत्तिर्ण भएकाहरुको स्वास्थ्य परीक्षण यही २०८१ वैशाख ३१ गतेदेखि जेठ २ गतेसम्म विभिन्न चार वटा अस्पतालमा हुने ईपीएस शाखाले जनाएको छ ।
त्यसका लागि पाटन अस्पताल, शुक्रराज ट्रपिकल अस्पताल, नेपाल कोरिया मैत्री अस्पाल र निजामती अस्पतालमा स्वास्थ्य परीक्षण हुने जनाइएको छ । यस्तै जेठ ५ गतेदेखि ८ गतेसम्म अनलाइनमार्फत रोजगार आवेदन फाराम दर्ता गरिने ईपीएस शाखाले जनाएको छ ।