बैतडी । बैतडीमा एक जना पुरुषको हत्या गरेर शव खोल्सामा फालेको अभियोगमा प्रहरीले एक महिला शिक्षिका लाई पक्राउ गरेको छ ।

पक्राउ पर्नेमा २६ वर्षीया भागरथी विष्ट रहेकी प्रहरीले जनाएको छ । उनले पाटन नगरपालिका–६ का ५१ वर्षीय विरभानसिंह विष्टको हत्या गरेको स्वीकार गरेको प्रहरीले जनाएको छ । पक्राउ परेकी भागरथीले विष्टको हत्या गरेर शव व्यवस्थापन गर्न एक अटो चालकलाई जिम्मा दिएको बयान समेत दिएकी बताइएको छ ।

पक्राउ परेकी भागरथी सहस्त्रलिङ्ग प्राविमा राहत शिक्षिकाको रुपमा कार्यरत छन् । एकल महिला समेत रहेकी निज शिक्षिका विष्टको बयानपछि प्रहरी टोली शव व्यवस्थापन गर्ने ती अटो चालकको खोजीमा लागेको र शव भने नजिकैको खोल्सामा फेला परेको बैतडीका प्रमुख जिल्ला अधिकारी भीमकान्त शर्माले बताए ।

हत्या गरिएका भनिएका विष्टको शव फेला परेको छ । विष्ट शनिबारदेखि परिवारको सम्पर्कमा थिएनन् । स्थानीयका अनुसार भागरथीले यही असार १ गते आफ्नै घरमा विरभानको हत्या गरेकी हुन् । हत्यापछि आइतबार मध्यरातसम्म आफ्नै घरभित्र लाश लुकाएकी र उनले आइतबार राति मात्रै शव व्यवस्थापनका लागि घरबाट निकालेको खुलेको छ ।

तर, सोमबार पक्राउ परेकी भागरथीको घरबाट खेतको आली हुँदै ५ सय मिटर तल सडकसम्म घिसारेर लगिएको छाप देखिएका स्थानीयले बताए । त्यहाँ रगतसमेत देखिएकाले स्थानीयले प्रहरीलाई खबर गरेका थिए । त्यसपछि प्रहरीले भागरथीलाई पक्राउ गरेको हो ।

हत्याको कारण भने अझै खुलेको छैन । तर, भागरथी र हत्या गरिएका पुरुषको चिनजान पुरानै रहेको खुलेको छ । प्रमुख जिल्ला अधिकारी शर्माका अनुसार ती पुरुषको हत्यामा अन्य दुई जना सहयोग भएको समेत पाइएको छ ।

ती सयोगीहरु बैतडीबाट धनगढी जान लागेको सूचना प्राप्त भएपछि १२५३ को बसमा बसेका उनीहरुलाई पक्राउ गर्न डडेल्धुरा प्रहरीलाई खबर गरेको प्रमुख जिल्ला अधिकारी शर्माले बताए ।

उनले भने, “भागरथीले ती पुरुषको हत्या गरिसकेपछि लाश व्यवस्थापन गर्न आफ्ना सहयोगीलाई २०/३० हजार रुपैयाँ दिएको भन्ने छ तर ती व्यक्तिहरु फेला परेका छैनन् ।”