काठमाडौँ । सहकारी संस्थाको वचत रकम अपचलन सम्बन्धी मुद्दामा नेपाल प्रहरीले पूर्वडीआईजी छविलाल जोशीलाई पक्राउ गरेको छ । जोशीलाई प्रहरीले आइतबार काठमाडौंबाट अपराह्न पक्राउ गरेको हो ।

सूर्यदर्शन वचत तथा ऋण सहकारीको रकम अपचलन गरेको मुद्दामा प्रहरीले पूर्वडीआईजी जोशीलाई पक्राउ गरेको हो ।जोशीलाई प्रहरीले जरुरी पक्राउ पुर्जी थमाएर पक्राउ गरेको हो । उनी भाग्ने योजना बनाएको सूचना पाएपछि पक्राउ गरेका बताइएको छ ।

उनी पक्राउ परेसँगै तत्कालीन गृहमन्त्री रवि लामिछानेलाई समेत प्रहरीले निगरानीमा राखेको छ ।

सांसद सुर्य थापा नेतृत्वको संसदीय छानविन विशेष समितिले गरेको सिफारिसका आधारमा सरकारको निर्देशनपछि जोशीलाई अनुसन्धानका लागि पक्राउ गरिएको हो । उनलाई काठमाडौँबाट पक्राउ गरिएको प्रहरी प्रधान कार्यलयले जनाएको छ ।

जोशीलाई उपत्यका अपराध अनुसन्धान कार्यालयले कास्की जिल्ला प्रहरीको पत्रका आधारमा पक्राउ गरेको स्रोतले जनाएको छ । प्रहरीबाट अवकाश पाएका जोशीलाई पोखरा लैजाने तयारी छ । उनी गोर्खा मिडिया नेटवर्कका सञ्चालक हुन् ।

पूर्वडिआइजी जोशी अर्घाखाँचीका हुन् । ५९ वर्षका जोशीलाई गोर्खा मिडिया नेटवर्कमा सहकारीको रकम लगेको र हिनामिना गरेको आरोप लागेको छ । उनीमाथि सुप्रिम बचत तथा ऋण सहकारी संस्था बुटवलको सदस्य भइ रकम गोर्खा मिडियामा ल्याएको देखिएको संसदीय छानबिन विशेष समितिले गरेको अनुसन्धानले देखाएको थियो ।
सहकारी बचत दुरुपयोग सम्बन्धी संसदीय विशेष समितिको प्रतिवेदनका आधारमा उनी पक्राउ परेका हुन् । गृहमन्त्री रमेश लेखकले प्रतिवेदन कार्यान्वयनका लागि प्रहरी महानिरीक्षक बसन्त कुँबरलाई निर्देशन दिएका थिए ।

संसदीय समितिले ९९ दिन लगाएर तयार पारेको प्रतिवेदन भदौ ३१ मा समितिले संसद्लाई बुझाएको थियो । सोही प्रतिवेदन गृहमन्त्रालयले आइतबार मात्रै प्रहरीलाई कार्यान्यनका लागि पठाएको थियो ।