सन् २०२० को नोभेम्बरपछि सार्वजनिक रुपमा कतै नदेखिएका अलिबाबा कम्पनीका संस्थापक ज्याक मा महिनौंपछि सार्वजनिक भएका छन् । उनी कहाँ छन् भन्ने बारे जानकारी नभएपछि धेरैले ज्याक मा हराएको आशंका गरेका थिए । 

आफ्नो च्यारिटी फाउन्डेशनको एक अभियानका लागि उनले भिडियो लिंकको माध्यामबाट ग्रामीण इलाकाका स्कुलमा काम गरिरहेका शिक्षकसँग कुराकानी गरेको भिडियो चीनको सरकारी मिडिया ग्लोबल टाइम्सले सामाजिक सञ्जालमा सेयर गरेको छ । अलिबाबा कम्पनी सुरु गर्नुभन्दा पहिला ज्याक मा आँफै अंग्रेजी भाषाका शिक्षक थिए । 

सीएनबीसीका अनुसार ज्याक माको भिडियो सार्वजनिक भएपछि हङकङ स्टक एक्सचेन्जमा उनको कम्पनीको स्टक मूल्यमा पाँच प्रतिशतले वृद्धि भएको छ । 

ब्लुमवर्गका अनुसार ज्याक मा अहिले पनि कहाँ छन् भनेर केही पत्ता लाग्न सकेको छैन ।