काठमाडौं । आज काठमाडौँका विभिन्न स्थानमा बिजुली काटिने भएको छ । नेपाल विद्युत् प्राधिकरणका अनुसार वितरण प्रणाली भूमिगत गर्ने प्रयोजनका लागि आज काठमाडौँका विभिन्न स्थानमा बिजुली काटिने भएको हो ।

महाराजगञ्ज वितरण केन्द्रको गोङ्गबु फिडर अन्तर्गत पर्ने स्थानहरुमा बिजुली काटिने प्राधिकरणले जनाएको छ ।

गोङ्गबु टाउन प्लानिङ, सामाखुसी, रानीबारी क्षेत्रमा बिहान ११ बजेदेखि अपराह्न १५ बजेसम्म बिजुली प्रवाह रोकिनेछ । सो फिडर अन्तर्गत वितरित विभिन्न स्थानलगायतका क्षेत्रका ग्राहकवर्गमा पर्न गएको असुविधाप्रति प्राधिकरणले क्षमायाचना गरेको छ । तोकिएको कार्य निर्धारित समय अगावै सम्पन्न गर्न प्राधिकरण क्रियाशिलसमेत रहने प्राधिकरणले सार्वजनिक गरेको सूचनामा उल्लेख छ ।

सोही वितरण केन्द्रकै हस्पिटल फिडरअन्तर्गत पर्ने त्रिभुवन विश्वविद्यालय शिक्षण अस्पताल, राष्ट्रपति कार्यालय, प्रहरी तोलिम केन्द्र, निर्मल निवासलगायतका स्थानमा उच्च क्षमताको प्रसारण लाइन र पोल स्थानान्तरण गर्ने कार्यका लागि बिहान १० बजेदेखि साँझ पाँचबजेसम्म बिजुली प्रवाह अवरुद्ध हुनेछ ।

त्यस्तै भोजपुर वितरण केन्द्र र सुर्खेत वितरण केन्द्रअन्तर्गत पर्ने विभिन्न स्थानमा पनि मर्मत प्रयोजनाका लागि आज बिजुली प्रवाह रोकिने प्रधिकरणले जनाएको छ ।