काठमाडौं । केही वर्षयता मुलुकमा आर्थिक गतिविधी सुस्त छ । आर्थिक गतिविधी कम भएपछि निर्माणजन्य सामाग्रीको माग पनि घटेको छ । यसको सिधा असर उद्योगहरुमा परेको छ । अधिकाँश उद्योग आधा भन्दा कम क्षमतामा सञ्चालन भइरहेका छन् ।

व्यवसायिक घरना शंकर ग्रुपको स्वामित्वमा रहेको जगदम्बा स्टिल्स लिमिटेडको व्यापार ३२.६४ प्रतिशत घटेको छ । गत वर्ष जगदम्बाले २९ अर्ब ७२ करोड ७० लाख रुपैयाँको मात्र डण्डीको व्यापार गरेको छ । अघिल्लो वर्ष २०२३ मा ३९ अर्ब ४३ करोड रुपैयाँको डण्डी कारोबार गरेको थियो ।

एक वर्षको अवधिमा उद्योगको डण्डी व्यापार ९ अर्ब ७० करोड रुपैयाँ घटेको सार्वजनिक गरेको वित्तीय विवरणमा उल्लेख छ ।

२०२५ को पहिलो त्रैमाशमा जगदम्बाले ५ अर्ब ६६ करोड ६० लाख रुपैयाँको डण्डी व्यापार गरेको छ । २०२२ मा ४९ अर्ब ७३ करोड ६० लाख रुपैयाँको डण्डी व्यापार गरेको थियो ।

आर्थिक गतिविधि सुस्त हुँदा उद्योगको व्यापारमा गिरावट आएको जगदम्बाले जनाएको छ । पछिल्लो तीन वर्षको वित्तीय विवरण हेर्दा जगदम्बा स्टिलको डण्डी कारोबार घट्दै गएको देखिएको छ । यस अवधिमा जगदम्बाको स्टिल व्यापार झण्डै २० अर्ब रुपैयाँ घटेको छ ।

जगदम्बाको अल्पकालिन र दीर्घकालिन गरि कूल ३३ अर्ब १५ करोड ५२ लाख रुपैयाँ ऋण रहेको छ । उद्योगको एक वर्षमा २ अर्ब ६३ करोड २० लाख रुपैयाँ ऋण थपिएको छ । उद्योगको इबिटा मार्जिन ७.८० प्रतिशत रहेको छ ।

जगदम्बा स्टिल्सले प्रिमियम मूल्यमा साधारण सेयर (आइपिओ) निष्कासन गर्न नेपाल धितोपत्र बोर्डमा आवेदन दिएको छ । उद्योगले प्रिमियमसहित प्रतिकित्ता ३ सय रुपैयाँमा आइपिओ निष्कासन गर्न प्रस्ताव गरेको हो । उद्योगले ६ अर्ब २ करोड १० लाख रुपैयाँ आइपिओ निष्कासनबाट जुटाउने लक्ष्य लिएको छ ।
उद्योगले एचआर र सिआर क्वाइल्स, वायर रड, पिग आइरन र स्पन्ज आइरन जस्ता महत्वपूर्ण कच्चा वस्तु चीन, अमेरिका र बेलायतबाट आयात गर्दै आएको छ ।

डलरमा हुने उतारचढावले गर्दा उद्योगको नाफामा असर गर्छ । कूल सञ्चालन आम्दानीमा कच्चा वस्तु खरिदमा ७१ प्रतिशत खर्च हुने गरेको जगदम्बाले जानकारी दिएको छ ।

जगदम्बाको २०२२ देखि भारतमा डण्डी निर्यात सुरु गरेको हो । गत वर्ष १७.६१ र यो वर्षको पहिलो त्रैमाशमा १३.४३ प्रतिशत निर्यात भएको छ ।

सरकारले ८ प्रतिशतसम्म निकासी अनुदान, मासिक १० करोड भन्दा बढी बिजुली खपत गर्ने उद्योगलाई महशुलमा १५ प्रतिशत छुट र १ हजार बढीलाई रोजगारी दिने उद्योगलाई ३० प्रतिशत आयकरमा छुट दिँदै आएको छ ।

उद्योगले जगदम्बा ई, जगदम्बा सुपर साइन, राइनो ५०० डी, जगदम्बा ग्याल्भा प्लस, जगदम्बा पाइप र जगदम्बा वायर ब्राण्डमा निर्माण सामाग्री उत्पादन गर्दै आएको छ ।

शंकर ग्रुपले जगदम्बा स्टिल सन् १९९३ मा स्थापना गरेको हो । जगदम्बा स्टिलले आइपिओ निष्कासन गर्न २०२२ मा पब्लिक लिमिटेडमा परिणत भएको हो । उद्योग बाराको सिमरामा छ । उद्योगको वार्षिक डण्डी उत्पादन क्षमता २४ लाख ४४ हजार टन रहेको छ । उद्योगको कोल्ड रोटेड, रोलिङ मिल्स, वायर र मेल्टिङ उत्पादन प्लान्ट छ ।

उद्योगको उत्पादन बजारमा पुर्याउन मुलुकभरी ५ सय ९० डिलरहरु रहेका छन् । शंकर ग्रुपको स्टिल, सिमेन्ट, पोलिमर, होटल, बिमा र बैंकिङ क्षेत्रमा लगानी रहेको छ । उद्योगको अध्यक्ष शाहिल अग्रवाल हुन् । साहिल शंकर ग्रुपको प्रवन्ध सञ्चालक पनि हुन् ।