रोनाल्डोले छाड्नासाथ युभेन्ट्सलाई नमिठो झट्का

सुनौलो नेपाल
आइतबार, १३ भाद्र २०७८

2.2K

एजेन्सी । टोलीका सुपरस्टार क्रिस्टियानो रोनाल्डोले क्लब छाडेपछिको पहिलो खेलमै युभेन्ट्सलाई नमिठो झट्का लागेको छ । इटालियन सिरी ‘ए’ अन्तर्गत घरेलु मैदानमा शनिबार राति भएको खेलमा युभेन्ट्स नवप्रवेशी इम्पोलीसँग १–० गोलले पराजित भयो ।

प्रतिस्पर्धात्मक खेलमा युभेन्ट्सलाई हराउन इम्पोलीका लियोनार्दाे मानकुसोले २१औं मिनेटमा गोल गरेका थिए । यता युभेन्ट्सको लगातार गोल प्रयासमा इम्पोलीका गोलरक्षक गुगलिलमो भिकारिओ बाधक बनेका थिए ।

सुक्रबार मात्र प्रभावशाली खेलाडी रोनाल्डोले युभेन्ट्स छाडेर इङ्लिस प्रिमियर लिग क्लब म्यानचेस्टर युनाइटेडसँग सम्झौता गरेका थिए । युनाइटेडलाई हराएको इम्पोलीले दुई खेलबाट तीन अंक बनाएको छ । इम्पोली ११औं स्थानमा छ । दुई खेलबाट एक अंक बनाएको युभेन्ट्स १३औं स्थानमा छ ।

पहिलो खेलमा युभेन्ट्स उडिनेससँग २–२ गोलको बरबरीमा रोकिएको थियो । अन्य खेलमा लाजियोले स्पेजियालाई ६–१ र फियोरेन्टिनाले टोरिनोलाई २–१ गोलले हराएको छ । एटलान्टा र बोलोग्नाले गोलरहित बराबरी खेल्दै अंक बाँडेको छ ।