एजेन्सी । अर्जेन्टिनी कप्तान लियोनल मेस्सीले ब्राजिलका महान फुटबल खेलाडी पेलेको कीर्तिमान तोडेका छन् । विश्वकप छनोट अन्तर्गत शुक्रबार बिहान भएको दक्षिण अमेरिकी छनोट खेलमा बोलिभियाविरुद्ध ह्याट्रिक गर्दै मेस्सीले पेलेको नाममा रहेको सर्वाधिक गोल कर्ताको कीर्तिमान तोडेका हुन् । 

कीर्तिमान आफ्नो नाममा लेखाउने क्रममा मेस्सीले एक सय ५३ खेलमा ७९ गोल गरे । यसअघि ८० वर्षीय पेलेको नाममा ९२ खेलमा ७७ गोलको कीर्तिमान थियो । ६ पटक बालोन डी’ओर विजेता मेस्सीले यसअघि गत डिसेम्वरमा मात्र एकै क्लबाट सर्वाधिक गोल गर्ने पेलेकै कीर्तिमान समेत भंग गरेका थिए । मेस्सीले बार्सिलोनाबाट सर्वाधिक ६ सय ७२ गोल गरेका छन् । यसअघि पेलेले ब्राजेली क्लब सान्तोसका लागि ६ सय ४३ गोल गरेका थिए । 

३४ वर्षीय मेस्सी विश्व फुटबलमा सर्वाधिक गोलकर्ताको सुचीमा भने छैटौ स्थानमा छन् । शीर्षस्थानमा रहेका पोर्चुगिज स्टार रोनाल्डोको नाममा एक सय ११ गोलको कीर्तिमान छ । ३६ बर्षीय रोनाल्डोले गत साता नर्दन आयरल्यान्डबिरुद्धको खेलमा दुई गोल गर्दै यसअघि इरानका अली दाईको नाममा रहेको एक सय ९ गोलको कीर्तिमान तोडेका थिए ।