बागमती प्रदेशकी मुख्यमन्त्री शाक्यले दिइन् राजीनामा

सुनौलो नेपाल
बुधबार, १० कार्तिक २०७८

1.3K

मकवानपुर । बागमती प्रदेशकी मुख्यमन्त्री अष्टलक्ष्मी शाक्यले प्रदेशसभामा विश्वासको मत नपाउने भएपछि राजीनामा दिएकी छन् ।

बुधबार दिउँसो बोलाइएको प्रदेशसभाको बैठकमा सम्बोधन गर्दै शाक्यले राजीनामा दिएकी हुन् । प्रदेशसभामा सम्बोधनका क्रममा आफ्नो दुई महिने कार्यकालका कामको समीक्षा गर्दै शाक्यले राजीनामा दिएकी हुन् ।

२०७८ भदौ २ गते मुख्यमन्त्री बनेकी शाक्य दुई महिना १० दिन मात्र मुख्यमन्त्री बनेकी हुन् । उनी नेपालको पहिलो महिला मुख्यमन्त्री हुन् । नेकपा (एमाले)को विवादमा पूर्वप्रधानमन्त्री माधवकुमार नेपाल पक्षमा रहेकी शाक्य मुख्यमन्त्री पद पाउने निश्चित भएपछि संस्थापन पक्षमा लागेकी थिइन् ।

शाक्य संस्थापन पक्षमा प्रवेश गरेपछि डोरमणि पौडेलले भदौ २ गते दलको नेता र मुख्यमन्त्री पदबाट राजीनामा दिएर उनलाई मुख्यमन्त्री पद दिन तयार भएका थिए । मुख्यमन्त्रीका लागि पौडेलले बाटो खुला गरिदिएपछि संविधानको धारा १६८ (१) अनुसार प्रदेश प्रमुख विष्णु प्रसाईंले शाक्यलाई बहुमतको आधारमा मुख्यमन्त्रीमा नियुक्त गरेका थिए ।