काठमाडौं । नेकपा एमालेकी सांसद गंगा चौधरीले बिहिबारको प्रतिनिधिसभाको बैठकमा विषेश समयमा बोल्दै शहरी विकास मन्त्रालय र मन्त्री रामकुमारी झाँक्रीमाथि गम्भिर आरोप लगाएकी छन् ।

केही दिन अघि मन्त्री झाँक्रीले आरोप लगाउनका लागि मात्रै नबोल्न भन्दै प्रतिनिधिसभा भवनबाट प्रमाण सहित प्रस्तुत हुन चुनौति दिएकी थिईन् । बिहिबार एमाले सांसद चौधरीले मन्त्री झाँक्रीले कमिसनको खेलमा लिप्त भएर टेण्डरको परिक्षा अगावै प्रश्नपत्र आउट गरेको भनि संसदमा आवाज उठाएकी छन् ।

मन्त्री झाँक्रीले ५८ करोडको पीएमएसपी र ३० करोडको युडिएसटिको प्रश्नपत्र परिक्षा अगावै आउट गरेको चौधरीले खुलासा गरेकी हुन् । ‘मन्त्री ज्युले जुन प्रमाण माग्नु भएको थियो त्यो प्रमाण मैले आज बोकेर आएकी छु । ५८ करोडको पीएमएसपी र ३० करोडको युडिएसटिको प्रश्नपत्र परिक्षा अगावै कसरी आउट भयो ?’ उनले प्रश्न गरिन ।

सो प्रश्नपत्र सुनौलो नेपाललाई प्राप्त भएको छ । जुन प्रश्नपत्र परिक्षा अगावै शहरी विकास मन्त्रालयले नै कमिशनको खेलमा आउट गरेको सांसद चौधरीको आरोप छ ।

चौधरीले मन्त्री झाँक्री कमिसनको खेलमा नीतिगत भ्रष्टाचार गरेको समेत आरोप लगाईन् ।