काठमाडौं । एमालेकी सांसद विमला घिमिरेले भारतमा पेट्रोलियम पदार्थको मूल्य घट्दा पनि त्यसको समायोजन गर्न सरकार तयार नभएको भन्दै आपत्ति जनाइन् । उनले किसानलाई खेतीवालीको बेला पनि मल नदिएको, गत वर्ष वर्षात्का कारण क्षति भएको किसानको अन्नवालीको अझै राहत नदिएको भन्दै सरकारको चर्को आलोचना समेत दिइन् ।

सांसद घिमिरेले भनिन्, ‘गत वर्ष किसानहरुले स्याहार्ने बेलाका धानवाली वर्षाले नष्ट भयो । त्यतिबेला सरकारले क्षतिपूर्ति दिने भन्दै स्थानीय तहमार्फत् त्यसको रेकर्ड माग्ने र बैंक खाता खोल्ने सम्मका कुराहरु सरकारले गर्न लगायो । तर, सरकारले यसको क्षतिपूर्ति त कुरै छोडौं । यो वर्ष धान रोप्नका निम्ति मल समेत दिन सकेन । कि यो सरकारले के काम गरिरहेको छ ? यो सरकार जनताको दुःखमा कुनै लेखाजोखा राख्न सक्छ कि सक्दैन ? यो जनताले थाहा पाउनै छोडिसके । अहिले भर्खरै नेपाल सरकारले पटकपटक पेट्रोलियम पदार्थको मूल्यवृद्धि गर्ने कुरामा हप्ता पनि बाँकि नराखि मूल्यवृद्धि ग¥यो । तर अहिले भारतमा मूल्य घट्दाखेरी फेरी त्यसको समायोजन गर्ने कुरामा कुनै चासो दिएको छैन ।’

सांसद घिमिरेले सरकारले जनतालाई राहत दिनै नचाहेको आरोप समेत लगाइन् ।