काठमाडौं । प्रधानमन्त्री पुष्पकमल दाहालले सबैको सामूहिक विवेक प्रयोग गरेर मुलुकमा देखा परेको आर्थिक संकट समाधान गर्ने बताएका छन् ।

मुलुकमा देखा परेका आर्थिक संकट समाधानका लागि आफूले केही दिन अघि मात्रै सरोकारवालाहरुसँग छलफल सुरु गरेको र केही दिन भित्र ती समस्याहरुको समाधानको प्रक्रिया अघि बढाउने उनको भनाई थियो ।

मंगलबार सोलुखोला–दूधकोशी जलविद्युत आयोजनाको काठमाडौंबाट उद्घाटन गर्दै प्रधानमन्त्री दाहालले आफूलाई प्रधानमन्त्रीको रुपमा असफल हुने छुट नरहेको बताए ।

उनले मुलुकभित्रै छिट्टै पेट्रोल उत्पादन हुने विश्वास व्यक्त गरे । त्यसका लागि अध्ययन र अनुसन्धानको काम धेरै अघि बढिसकेको प्रधानमन्त्री दाहालका जिकीर थियो ।

प्रधानमन्त्री दाहालले विद्युत व्यापारबाटै व्यापार घाटा सन्तुलनमा ल्याउन सकिने दावी गरे । मुलुक विद्युतमा आत्मनिर्भर भएको उल्लेख गर्दै प्रधानमन्त्री दाहालले त्यसलाई विक्री गर्नका लागि सरकारले भारत र बंगलादेशसँग पनि सहमती गरेको बताए ।

आफू हाईड्रोजन गाडी चढ्ने तयारीमा रहेको बताउँदै उनले डिजेल र पेट्रोलको विकल्पमा हाइड्रोजन गाडी चढ्न नेपाल विद्युत प्राधिकरणका एमडी कूलमान घिसिङले प्रधानमन्त्री बनेको बेला सल्लाह दिएको बताए । सोही सल्लाह अनुसार आफूले प्रधानमन्त्री कार्यालयमा त्यसको तयारीका लागि छलफल अघि बढाएको प्रधानमन्त्री दाहालको भनाइ छ ।

प्रधानमन्त्री दाहालले ग्रिन इनर्जीबाट हाइड्रोजन इनर्जीमा गएर मुलुकमा विभिन्न उद्योग, व्यवसाय संचालन गरी आर्थिक गतिविधिलाई अघि बढाउन सकिने स्पष्ट पारे ।