काठमाडौँ । दसैँ, तिहार र छठका लागि राष्ट्र बैंकले हरेक वर्ष नयाँ नोट साट्ने सुविधा दिँदै आएको छ ।

यस वर्षका लागी नयाँ नोट वितरणका लागी हालसम्म मिति तय भएको छैन तथापि यो वर्षका लागि नयाँ नोट कति आवश्यक पर्ने हो भनेर राष्ट्र बैङ्कका प्रादेशिक कार्यालय र नोट कोष सुविधा लिएका बैङ्कहरूबाट विवरण सङ्कलन भइरहेको छ ।

नेपाल राष्ट्र बैङ्कले यस वर्षको दसैँका लागि प्रतिव्यक्ति १८ हजार पाँच सय रुपैयाँको दरले नयाँ नोट वितरण गर्ने तयारी गरेको छ । घटस्थापना आसपासदेखि नयाँ नोट वितरण सुरु गर्ने राष्ट्र बैङ्कको तयारी छ ।

विवरण सङ्कलन भइसकेपछि वितरणको काम सुरु हुने छ । नेपाल राष्ट्र बैङ्क मुद्रा व्यवस्थापन विभाग प्रमुख नरेश शाक्यका अनुसार घटस्थापना आसपासदेखि प्रतिव्यक्ति १८ हजार पाँच सय रुपैयाँसम्म नयाँ नोट वितरण गर्ने तयारी छ ।

अघिल्ला दुई वर्ष पनि राष्ट्र बैङ्कले प्रतिव्यक्ति बढीमा १८ हजार ५ सय रुपैयाँसम्म नयाँ नोट दिने गरेको थियो । बैङ्क तथा वित्तीय संस्थाहरूलाई भने उनीहरूको माग र ग्राहकको सङ्ख्या अनुसार नयाँ नोट उपलब्ध गराउने तयारी रहेको बैङ्क स्रोतको भनाई छ ।