काठमाडौं । निजी तथा सार्वजनिक लगानीमा सञ्चालित नेको इन्स्योरेन्स लिमिटेडले २ सय मेगावाटसम्म जलविद्युत आयोजना बनाउने भएको छ ।

आयोजना लिनका लागि नेको इन्स्योरेन्सले प्रस्ताव मागेको छ । मुलुकको पूर्वाधार विकासमा योगदान गर्न जलविद्युतमा सहभागी भएर लगानीलाई विविधिकरण गर्ने उद्देश्य अनुसार जलविद्युत आयोजना बनाउन लागेको नेको इन्स्योरेन्सले जनाएको छ । नेकोले ‘टेक्निकल स्पेशिफिकेसन’भित्र पर्ने जलविद्युत आयोजना खरिद गरेर आफैले निर्माण थाल्ने भएको हो ।

जलविद्युत आयोजना खरिद गरेर निर्माण गर्ने नेको मुलुककै पहिलो निर्जीवन बिमा कम्पनी हो । बिमा कम्पनीरुको अधिकाँश लगानी बैंकको मुद्धति निक्षेपमा हुने गरेको छ ।

नेकोले न्यूनतम ५० मेगावाटदेखि २ सय मेगावाटसम्मका आयोजना हेरेको छ । नदी प्रवाही (आरओआर) अर्धजलासय र जलासय जुन आयोजना भए पनि बनाउने नेकोले जनाएको छ । कम्पनीले योग्य तथा इच्छुक जलविद्युत आयोजनका लगानीकर्तालाई आशयपत्र पेश गर्न भनेको छ ।

आशयपत्रमा जलविद्युत आयोजनाको सुरुङको लम्बाइ बढीमा ८ किलोमिटर हुनुपर्ने, यस्तै आयोजनाको विद्युतगृहबाट नेपाल विद्युत प्राधिकरणरको सबस्टेशन दुरी बढीमा २० किलोमिटर हुनुपर्ने, विद्युत प्राधिकरणसँग विद्युत खरिदबिक्री सम्झौता (पिपिए) भएको वा प्रक्रिया अघि बढेको हुनुपर्ने नेकोले जनाएको छ ।

यस्तै विद्युत उत्पादन अनुमतिपत्र (लाइसेन्स) लिएको वा लिने प्रक्रिया अघि बढेको हुनुपर्ने छ । आयोजनाको खुद हेड ६ सय मिटर अग्लो हुनुपर्ने कम्पनीले जनाएको छ ।

नेकोले छनौट गरेको आशयपत्र अन्तर्गतको आयोजना खरिद वा लगानी गर्नको लागि आवश्यक स्वीकृति प्राप्त भएपछि आयोजना धनीसँग सम्झौता गरि भुक्तानी गरीने र स्वामित्व हस्तानन्तरण हुने कम्पनीले जानकारी दिएको छ ।

नेको इन्स्योरेन्स नेपाल स्टक एक्सचेन्ज (नेप्से) मा सूचिकृत कम्पनी हो । नेकोले चालू आर्थिक वर्षको ९ महिनामा १५ करोड ६२ लाख रुपैयाँ खुदनाफा गरेको छ । कम्पनीको चुक्ता पुँजी २ अर्ब रुपैयाँ रहेको छ ।