काठमाडौँ । भगवान पशुपतिनाथको मन्दिरमा चढाइएको भेटी चोरी गराउने कार्यमा पशुपति क्षेत्र विकास कोषका कोषाध्यक्ष नारायणप्रसाद सुवेदी नै संलग्न रहेको आरोप लागेको छ ।

कोषाध्यक्ष सुवेदीसहितका केही कर्मचारीकै निर्देशनमा आफूले भेटी चेर्ने गरेको भेटी चोर्दा चोर्दै सोमबार पक्राउ परेका अनिल परियारले आरोप लगाएका थिए । मन्दिर भित्रबाटै भेटी चोरी हुने जानकारी आएपछि सीसीटीभीको निगरानीमा राख्दा भेटी चोरीरहेको अवस्थामा पशुपति क्षेत्र विकास कोषका ७ जना कर्मचारीसहित ८ जनालाई सोमबार रंगेहात पक्राउ गरी प्रहरी वृत्त गौसालालाई बुझाइएको कोषका कोषअध्यक्ष रेवतीरमण अधिकारीले बताए ।

पक्राउ परेका मध्ये कर्मचारी अनिल परियारले सुवेदीको नाम पनि पोलेका हुन् । उनले आफू पशुपतिमा बाजा बजाउने निम्न स्तरको कर्मचारी रहेको र कोषकै कोषअध्यक्ष सुबेदी लगायत अन्य केही पदाधिकारीले भेटी चोरी गर्न लगाएको बयान दिएका हुन् । पशुपति क्षेत्र विकास कोषले निगरानी गर्दा संस्कृति संरक्षण महाशाखाको भेटी गणना कक्षबाट कर्मचारीले नै ज्याकेटमा लुकाएर भेटी लुकाएर लैजाने गरेको खुलेको छ ।

कोषको नेतृत्वले महानगरीय प्रहरी वृत्त गौशालाको टोली बोलाएर ८ जनालाई अनुसन्धानका लागि जिम्मा लगाएको थियो ।
पक्राउ पर्नेमा कोषका नायव सुब्बा नवराज ढोडारी, मन्दिरको ढोकापाले नवराज घिमिरे, मन्दिरमा बाजा बजाउने कर्मचारीहरु अनिल परियार, सञ्जय कपाली र कुमार दमाई रहेका छन् ।

पक्राउ परेका मध्ये मन्दिरको ब्राह्मण राम सापकोटा र लक्ष्मण सापकोटाको संलग्नता नदेखिएको भन्दै आज प्रहरीले छाडेको प्रवक्ता अधिकारीले जानकारी दिए । पशुपतिनाथ मन्दिर परिसरमा रहेको नेपाल इन्भेस्टमेन्ट मेघा बैंकको रकम संकलन केन्द्रका एक कर्मचारीलाई पनि प्रहरीले नियन्त्रणमा लिएको जनाइएको छ ।

भेटी संकलनको जिम्मेवारी नायव सुब्बा ढोडारीले हेर्दै आएका थिए । तर, कोषाध्यक्ष सुवेदीले आर्थिक नियमावलीविपरीत बाजा बजाउने कर्मचारीलाई खटाएको स्रोतले बतायो ।

दैनिक तीन लाखदेखि तीन लाख ५० हजार रुपैयाँसम्म भेटी संकलन हुने पशुपतिमा दैनिक १० देखि १५ हजार रुपैयाँसम्म चोरी हुने गरेको देखिएको छ । उनीहरुमाथि सीसीटीभी फुटेज र अन्य प्राविधिक पाटोबाट थप अनुसन्धान भइरहेको प्रहरी वृत्त गौशालाका डीएसपी केशवराज थेबेले जानकारी दिए ।