सुनौलो नेपालको ‘गण्डकीको पर्यटन र अर्थतन्त्रको उडान’ प्यानल डिस्कसन सम्पन्न, कसले के भने ?

पोखरा । सञ्चार प्रतिष्ठान सुनौलो नेपालले पोखरामा ‘गण्डकीको पर्यटन र अर्थतन्त्रको उडान’ नामक प्यानल डिस्कसन कार्यक्रम सम्पन्न गरेको छ ।

सूचना तथा सञ्चार मन्त्री पृथ्वी सुब्बा गुरुङ प्रमुख अतिथि रहेको कार्यक्रम तीन सेसनमा सम्पन्न भएको हो । कार्यक्रम अन्तर्गत पहिलो सेसनमा ‘गण्डकी र राष्ट्रिय पर्यटन शीर्षक’ माथि चर्चा भएको थियो । जसमा राष्ट्रिय योजना आयोगका पूर्वाध्यक्ष डा. मीन बहादुर श्रेष्ठ, पोखरा महानगरपालिकाका मेयर धनराज आचार्य र नेपाल पर्यटन बोर्डका प्रमुख कार्यकारी अधिकृत दिपकराज जोशी वक्ताका रुपमा थिए । यो सेसनमा नेपाल वायुसेना निगमका पूर्व महाप्रबन्धक डिमप्रकाश पौडेलले सहजकर्ताको भूमिका निर्वाह गरेका थिए ।

त्यस्तै दोस्रो सेसन ‘पर्यटन, पोखरा विमानस्थल र राष्ट्रिय अर्थतन्त्र’ मा केन्द्रित रह्यो । यस शीर्षकमा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, उच्चस्तरीय आर्थिक क्षेत्र सुधार सुझाव आयोगका संयोजक रामेश्वर खनाल र नेपाल उद्योग वाणिज्य महासंघका अध्यक्ष चन्द्रप्रसाद ढकाल वक्ता थिए भने नबिल बैंकका सिनियर डिसिइओ मनोज ज्ञवालीले सहजता गरेका थिए ।

कार्यक्रमको तेस्रो सेसनमा ‘पोखरामा पर्यटनका थप सम्भावना’ बारे चर्चा गरिएको थियो । यस सेसनमा गण्डकी प्रदेशका सामाजिक विकास, युवा तथा खेलकुद मन्त्री विन्दु कुमार थापा, नेपाल उद्योगव वाणिज्य महासंघका वरिष्ठ उपाध्यक्ष अन्जन श्रेष्ठ, पर्यटन व्यवसायी पोम नारायण श्रेष्ठले वक्ताको भूमिकामा थिए । तेस्रो सेसनलाई सञ्चारकर्मी सुमन ढुंगानाले सहजता गरेका थिए ।