काठमाडौं । विभिन्न १६ उद्योगहरुले साधारण सेयर (आइपिओ) निष्कासन गर्न लागेका छन् । उत्पादन तथा प्रशोधन कम्पनीहरुले २२ अर्ब ५४ करोड ३७ लाख रुपैयाँ बराबरको ९ करोड ६ लाख ५५ हजार ६ सय ८४ कित्ता आइपिओ निष्कासन गर्न लागेका हुन् ।

उद्योगहरुले आइपिओ निष्कासन गर्न नेपाल धितोपत्र बोर्डमा आवेदन दिएका छन् । बोर्डमा आवेदन दिने मध्ये पाँच उद्योगहरुले प्रिमियम मूल्यमा आइपिओ ल्याउन लागेका हुन् ।

प्रिमियममा आइपिओ ल्याउने तयारीमा रहेका उद्योगहरुमा शंकर ग्रुपको जगदम्बा स्टिल लिमिटेड रहेको छ । जगदम्बाले प्रतिकित्ता ३ सय रुपैयाँ थपेर ४ सय रुपैयाँमा आइपिओ ल्याउन बोर्डमा आवेदन दिएको छ ।

यस्तै सौर्य सिमेन्ट उद्योग लिमिटेडले प्रतिकित्ता २ सय ६४.५१ रुपैयाँ प्रिमियम थपेर आइपिओ ल्याउन लागेको छ । मारुती सिमेन्ट लिमिटेडले प्रतिकित्ता ३ सय ७७ रुपैयाँ प्रिमियम थपेर आइपिओ ल्याउन लागेको हो ।

रिद्धिसिद्धि सिमेन्ट लिमिटेडले पनि प्रतिकित्ता २ सय १४.१० रुपैयाँ प्रिमियम थपेर आइपिओ ल्याउन लागेको छ भने अम्बे स्टिल लिमिटेडले प्रतिकित्ता ३ सय ३ रुपैयाँ प्रिमियम थपेर आइपिओ ल्याउन लागेको हो । पछिल्लो समय प्रिमियम मूल्य र बुकबिल्डिङ आइपिओ निष्कासन विवादित बन्दै आएको छ ।
यस्तै एभरेष्ट कलर लिमिटेडले प्रतिकित्ता ५० रुपैयाँमा आइपिओ ल्याउन बोर्डमा आवेदन दिएको छ ।

एसवाइ प्यानल लिमिटेड, स्मार्ट डोर्स लिमिटेड, पाल्पा सिमेन्ट इन्डष्ट्रिज लिमिटेड, लक्ष्मी टेक्नोप्लास्ट लिमिटेड, श्री डिष्टिलरी लिमिटेड, सोपान फर्मास्युटिकल्स लिमिटेड, एक्कर्ड फर्मास्युटिकल्स लिमिटेड र सागर डिष्टिलरी लिमिटेडले अंकित मूल्यमा आइपिओ ल्याउन बोर्डमा आवेदन दिएका छन् ।

यस्तै ओम मेगाश्री फर्मास्युटिकल्स लिमिटेडले आइपिओ निष्कासन गर्न बोर्डले अनुमति दिइसकेको छ । आइपिओ चाँडै निष्कासन गर्ने तयारीमा बोर्ड रहेको छ । ओम मेगाश्रीले अंकित मूल्य १ सय रुपैयाँमा आइपिओ निष्कासन गर्न लागकोे हो ।

चालू आर्थिक वर्षको ६ महिनामा चार कम्पनीहरुले आइपिओ ल्याउन अनुमति पाइसकेका छन् । यी मध्ये गार्डियन माइक्रो लाइफ इन्स्योरेन्स लिमिटेड, नेपाल माइक्रो लाइफ इन्स्योरेन्स कम्पनी लिमिटेड, क्रेस्ट माइक्रो लाइफ इन्स्योरेन्स लिमिटेडले बोर्डबाट आइपिओ ल्याउन स्वीकृति पाइसकेका छन् । यी मध्ये गार्डियनले आइपिओ निष्कासन गरिसकेको छ ।