काठमाडौं । नेपाल आयल निगमले पेट्रोलियम पदार्थको मूल्य घटाएको छ ।

बिहीबार एक सूचना जारी गर्दै पेट्रोल, डिजेल र मट्टितेलको मूल्य घटाइएको निगमले जानकारी दिएको हो ।

सरकारको निर्देशनअनुसार मूल्य समायोजन गरिएको निगमका नायाव कार्यकारी निर्देशक सुशील भट्टराईले जानकारी दिए ।

नयाँ मूल्यअनुसार पेट्रोलको मूल्य प्रतिलिटर १७० रुपैयाँ छ । यसअघि १८० रुपैयाँ प्रतिलिटर थियो । यस्तै डिजेलको मूल्य १५३ रुपैयाँ कायम भएको छ । यसअघि १६३ रुपैयाँ प्रतिलिटर थियो । मट्टितेलको मूल्य पनि १० रूपैयाँ घटेको छ ।

खाना पकाउने ग्यास र हवाई इन्धनको मूल्य भने यथावत राखिएको छ ।

सरकारले हालै इन्धनमा लाग्दै आएको १० रुपैयाँ पूर्वाधार कर छुट दिने निर्णय गरेको थियो । भारतले पठाएको नयाँ मूल्यअनुसार पेट्रोलको मूल्य बढेको थियो भने ग्यास, डिजेल र मट्टितेलको मूल्य घटेको थियो ।

इन्धनको मूल्य घटेसँगै सार्वजनिक यातायातको भाडादर पनि समायोजन हुने छ । यातायात व्यवस्था विभागले इन्धनमा एकैपटक ५ रुपैया माथि वृद्धि हुँदा भाडादर स्वतः समायोजन हुने नीति बनाएको छ ।