काठमाडौं । नेपाल उद्योग वाणिज्य महासंघका उपाध्यक्ष दिनेश श्रेष्ठले एक वर्षपछि महासंघको विधान संशोधन हुने बताएका छन् । बिहीवार काठमाडौंमा नेपाल युवा उद्यमी संघ ललितपुरको प्रथम वार्षिक साधारण सभामा बोल्दै उपाध्यक्ष श्रेष्ठले यस्तो बताएका हुन् ।

उनले महासंघको सन् २००६ साल देखि विधान संशोधन नभएकाले अर्को वर्ष विधान संशोधन गर्ने तयारीमा महासंघ रहेको बताए । उनले महासंघको विधान संशोधन गर्दा नेपाल युवा उद्यमी संघको अध्यक्षलाई स्वत महासंघको सदस्य वा कार्यसमिति सदस्यको रुपमा राख्ने गरी विधान संशोधन गरिने बताए । उपाध्यक्ष श्रेष्ठले लामो समय देखि युवा उद्यमीलाई महासंघमा ल्याउनु पर्छ भनेर लागि परेकाले त्यही अनुसार संधोधन हुने प्रतिवद्धता जनाए ।

उनले भने,‘ २००६ पछि नेपाल उद्योग वाणिज्य महासंघको विधान संशोधन भएको छैन । अस्ति विद्यान संशोधन हुने कुरामा पनि अब अर्को वर्ष संशोधन हुन्छ होला । महासंघको विद्यान संशोधन हुँदा नेपाल युवा उद्यमी संघको अध्यक्षलाई स्वत महासंघको सदस्यको रुपमा वा कार्यसमितिको रुपमा कसरी ल्याउन सकिन्छ । त्यसबारे छलफल गर्ने छौं । अझ युवा उद्यमीहरुसँग कसरी काम गर्न सकिन्छ भन्ने कुरा पहिला देखि प्रयास गरेको छु । त्यो काम गर्ने प्रतिवद्धता जनाउन चाहान्छु ।’

युवा उद्यमी संघ ललितपुर शाखाले बिहीवार नै नयाँ नेतृत्व चयन ंगरेको छ । युवा उद्यमी राजकरण श्रेष्ठको नेतृत्वमा ११ सदस्यीय नयाँ कार्यसमिति बनेको छ । संघका नवनिर्वाचित अध्यक्ष राजकरण श्रेष्ठले युवा उद्यमी संघलाई नेपालका युवा उद्यमी बन्न चाहाने युवाहरुलाई सहयोग गर्ने माध्यम बनाउने बताए । उनले सरकारसँग युवा उद्यमको लागि रहेका समस्या समाधान गर्ने र नीतिगत व्यवस्थामा सहजीकरण गर्ने काममा निरन्तर लाग्ने बताए ।

अध्यक्ष श्रेष्ठले उद्यमीहरुलाई कानुनी प्रक्रियाका बारेमा सरकारसँग मिलेर प्रशिक्षण गराउने काम संघले गर्ने बताए ।