विमान दुर्घटनामा परेका चारजना अझै बेपत्ता, खोजीका लागि सशस्त्रको गोताखोर परिचालन

सुनौलो नेपाल
आइतबार, १ माघ २०७९

पोखराको सेती नदी खोंचमा आइतबार भएको यति एयरलाइन्सको विमान दुर्घटनामा परेकाहरुको उद्धार गर्दै सुरक्षाकर्मी । तस्बिरः कृष्ण दवाडी/रासस

पोखरा । दुर्घटनामा परेको यति एयरलाइन्सको विमानमा सवार चारजना यात्रुको अवस्था अझै अज्ञात छ । विमानमा सवारमध्ये ६८ जनाको शव प्राप्त भइसके पनि बाँकी चारजनाको खोजी भइरहेको कास्कीका प्रमुख जिल्ला अधिकारी टेकबहादुर केसीले जानकारी दिए ।

उनीहरूको खोजीका लागि सशस्त्रको गोताखोर परिचालन भइरहेको जानकारी दिँदै उनले खोजीका लागि रात्रिकालीन बत्तीको व्यवस्था गरिएको बताए । उनका अनुसार हालसम्म ४४ वटा शव गण्डकी हस्पिटल पठाइसकिएको छ ।

उनले भेटिएका शवमध्ये पोखरा र आसपासका व्यक्तिको यहीँ नै आफन्तलाई जिम्मा लगाइने जानकारी दिए। काठमाडौँका शव उतै आफन्तलाई बुझाउने गरी पठाउने सोच बनाइएको उनको भनाइ थियो । अप्ठेरा खोँचमा रहेका केही शव निकाल्नका लागि क्रेनको प्रयोग भइरहेको उनले बताए ।