पोखरा । पोखराको सेती खोँचमा यती एअरलाइन्स विमान दुर्घटनामा परेर बेपत्ता भएका थप एकजनाको शव फेला परेको छ । योसँगै ७० जनाको शव फेला परेको प्रहरीले जनाएको छ । अब २ जनाको शव फेला पर्न बाँकी छ । बाँकी २ जनाको भोलिमात्रै खोजी गरिने प्रहरीले जानकारी दिएकाे छ ।

आइतबार दुर्घटनामा परेको यती एअरलाइन्सको हवाइजहाजमा  चार जना चालक दल र ६८ जना यात्रु सवार रहेका थिए । विमान दुर्घटनामा निधन भएकामध्ये २४ व्यक्तिको शव परीक्षण पोखरामा हुनेभएको छ । पश्चिमाञ्चल क्षेत्रीय अस्पतालले दिएको जानकारीअनुसार ती शवको परीक्षण प्रक्रिया सुरू भइसकेको छ ।

बाँकी शवको परीक्षण भने काठमाडौँस्थित शिक्षण अस्पतालमा हुने जनाइएको छ । यहाँ शव परीक्षण हुन नसकेका शवलाई हेलिकप्टरमार्फत काठमाडौँ लगिने जिल्ला प्रहरी कार्यालयका प्रवक्ता ज्ञानबहादुर खड्काले जानकारी दिए ।