काठमाडौँ । निजी क्षेत्रको साँझा संगठन नेपाल उद्योग वाणिज्य महासंघको नयाँ केन्द्रीय नेतृत्वमा चन्द्रप्रसाद ढकाल चयन भएका छन् । महासंघको ५७ औँ वार्षिक साधारण सभाबाट नयाँ बन्ने कार्यसमितिको निवर्तमान वरिष्ठ उपाध्यक्ष नै महासंघ नेतृत्वमा पुग्ने विधान बमोजिम ढकाल स्वतः अध्यक्षमा निर्वाचित भएका हुन् ।

एसोसिएटतर्फको उपाध्यक्षमा निर्विरोध निर्वाचित भएका ढकाल त्यसअघि उनी एकपटक निर्विरोध र एकपटक सबैभन्दा बढी भोट ल्याएर कार्यसमिति सदस्यमा निर्वाचित भएका थिए । ‘समृद्धिको आधार राज्य–निजी क्षेत्र साझेदार’को नारासहित महासंघको ५४औँ महाधिवेशनमा होमिएका ढकालले वरिष्ठ उपाध्यक्षमा जित निकालेका थिए ।

यसपूर्व वरिष्ठ उपाध्यक्षमा निर्वाचित भएसँगै ढकालले तीन वर्षपछि बन्ने कार्यसमितिमा अध्यक्षको पद सुनिश्चित गरेका थिए । महासंघको विधानले वरिष्ठ उपाध्यक्ष स्वतः अध्यक्ष हुने व्यवस्था गरेको छ । निवर्तमान अध्यक्ष शेखर गोल्छाले आउँदो तीन वर्षे कार्यकालका लागि महासंघ नेतृत्व वरिष्ठ उपाध्यक्ष चन्द्रप्रसाद ढकाललाई हस्तान्तरण गरेका हुन् ।

को हुन् अध्यक्ष ढकाल ?

पहिलो पुस्ताका सफल उद्यमी–व्यवसायी चन्द्रप्रसाद ढकालले दुई कार्यकाल नेपाल उद्योग वाणिज्य महासंघको कार्यकारिणी समिति सदस्य ढकालले लगानी समिति, रोजगारदाता परिषद्को सभापति, एसोसिएट उपाध्यक्ष हुँदै वरिष्ठ उपाध्यक्षको जिम्मेवारी सम्हालिसकेका छन् ।

महासंघका नवनिर्वाचित अध्यक्ष ढकाल आइएमई ग्रुपका संस्थापक अध्यक्ष हुन् । उनको व्यावसायिक यात्रा करिब चार दशक लामो छ । विसं २०२२ सालमा बागलुङको अमलाचौरमा जन्मेका ढकालले विसं २०४५ बाट आफ्नो व्यवसाय सुरु गरेका हुन् ।

त्यसपछि विसं २०४८ मा कार्गो कम्पनी हुँदै २०५७ मा नेपालको पहिलो रेमिट कम्पनी आइएमई रेमिट स्थापना गरेर अध्यक्ष ढकालले व्यावसायिक फड्को मारेका हुन् । हाल आइएमई ग्रुपसँग सम्बद्ध दुई दर्जन भन्दा बढी व्यवसाय तथा उद्योग प्रतिष्ठानहरु नेपालसहित विश्व बजारमा स्थापित छन् ।

ढकाल नेतृत्वको आइएमई ग्रुपले २० हजार जना भन्दा बढी प्रत्यक्ष र ४० हजार जना भन्दा बढीको संख्यामा अप्रत्यक्ष रोजगारी दिन सफल भएको छ ।

ढकालको नेतृत्वमा आइएमई ग्रुपले आफ्नो लगानी तथा उद्यमशीलतालाई सेवा क्षेत्र, पूर्वाधार विकास र उत्पादनमुलक क्षेत्रमा केन्द्रित गरी दुई दर्जनभन्दा बढी कम्पनी स्थापना तथा सञ्चालन गरी व्यवसाय विस्तार गरिरहेको छ । यसअन्र्तगत रेमिट, बैंकिङ, व्यापार, सूचना प्रविधि, सञ्चार, ऊर्जा, पर्यटन, होटल तथा रिसोर्ट, अटोमोबाइल, बीमा, खेलकुद तथा मनोरञ्जनको क्षेत्रका कम्पनीहरु बजारमा प्रतिस्पर्धी र गतिशील छन् ।

ग्लोबल आइएमई बैंक, नेपाल इन्फ्रास्ट्रक्चर बैंक, आइएमई लिमिटेड, आइएमई जनरल इन्स्योरेन्स, आइएमई डिजीटल सोलुसन्स्, हिमालय पावर पार्टनर, माउन्टेन इनर्जी, चन्द्रागिरि हिल्स लिमिटेड, आइएमई मोटर्स, डिस मिडिया नेटवर्कलगायतका कम्पनीहरुमा आइएमई ग्रुपको प्रमुख हिस्सेदारी छ ।

पछिल्लो समय पर्यटन पूर्वाधारमा लगानी विस्तार गर्दै ढकाल सातवटै प्रदेशमा केवलकारसहितका नयाँ पर्यटकीय गन्तब्य निर्माणमा सक्रिय छन् ।

नेपालको अर्थतन्त्रको मेरुदण्ड मानिने रेमिट्यान्सलाई वैधानिक माध्यमबाट स्वदेश भित्र्याउने व्यवसाय मार्फत् देशको औपचारिक अर्थतन्त्र विकासमा अध्यक्ष ढकालको उल्लेखनीय योगदान छ । विदेशमा कमाएको रकम वैधानिक माध्यमबाट देश पठाउँदा लाखौँ श्रमिकहरु अनावश्यक झन्झट र ठगी हुनबाट जोगिएका छन् ।

औपचारिक माध्यम मार्फत् ठूलो मात्रामा रेमिट्यान्स नेपाल ल्याउने सफल संस्थाको नेतृत्वको रुपमा ढकाल, नेपाल सरकारले पटक पटक ‘महत्वपूर्ण व्यावसायिक व्यक्ति सम्मान–सिआइपी’ बाट सम्मानित भएका छन् । यस्तै रेमिट्यान्स व्यवसायहरू मध्येबाट सबैभन्दा बढी कर तिरेको आधारमा लगातार चार पटकसम्म ‘ठूला करदाता सम्मान’ बाट आइएमई पुरस्कृत भएको छ ।

सेवा तथा उत्पादनमूलक उद्योगहरुमा थप लगानी प्रवद्र्धन र सर्वसाधारण समेतलाई नाफाको हिस्सेदार बनाउने उद्देश्य राख्दै आइएमई ग्रुपका कम्पनीहरु पब्लिक लिमिटेडमा लैजाने प्रतिबद्धतालाई ढकालले प्राथमिकताका साथ कार्यान्वयन गरिरहेका छन् ।

यसरी आइएमई ग्रुप, स्थापनाकालदेखि नै गुणस्तरीय सेवा प्रवाहमा उत्कृष्ट र विस्तारित सेवाहरूको माध्यमबाट राष्ट्रिय अर्थतन्त्रको विकास तथा आफ्ना ग्राहकहरूको आर्थिक–सामाजिक रुपान्तरणमा समर्पित देखिन्छ ।

२०७२ को भूकम्प र कोभिड–१९ को महामारी तथा अन्य विपद्का समयमा समेत उद्धार, तत्काल राहत वितरणमा आइएमई ग्रुपलाई नै परिचालन गर्न समेत अध्यक्ष ढकालले अग्रसरता लिँदै आएका छन् । कोभिड–१९ मा आइएमई ग्रुपले भरोसा कोष स्थापना गर्दै करोडौं रुपैयाँ बराबरको सहयोग गरेको थियो । ग्रुपले वैदेशिक रोजगारीमा रहँदा कोभिड १९ बाट मृत्यु भएका श्रमिकका परिवारलाई नगद सहयोग समेत गरेको थियो ।

नेपालका लागि गणतन्त्र इन्डोनेसियाको अवैतनिक वाणिज्यदूतको रुपमा रहेका ढकाललाई २०७२ को महाभूकम्पका समयमा उद्धार र राहतमा गरेको योगदानको प्रशंसा गर्दै गणतन्त्र इन्डोनेसियाको परराष्ट्र मन्त्रालयले समेत सम्मान गरेको थियो ।

अध्यक्ष ढकाल, नेपाल सरकारबाट प्रदान गरिने प्रतिष्ठित सुकीर्तिमय राष्ट्रदीप, गोरखा दक्षिण बाहु चौथो र प्रबल जनसेवाश्री चौथो लगायतका मानपदवीबाट सम्मानित व्यक्तित्व हुन् ।

महासंघको नव–निर्वाचित अध्यक्षको रुपमा ढकालले उद्योगी व्यवसायीहरुको मनोबल उच्च बनाउदै अर्थतन्त्रमा निजी क्षेत्रको योगदान वृद्धि गर्ने, सार्वजनिक–निजी साझेदारीको प्रवद्र्धन गर्ने तथा स्वदेशी–विदेशी लगानी पर्वद्धन सँगसगै निजी क्षेत्रको सम्मान वृद्धि गर्ने एजेण्डालाई मुख्य प्राथमिकतामा राखेका छन् ।

वरिष्ठ उपाध्यक्षको कार्यकालमा हरेक प्रदेशमा कम्तीमा एउटा ठूलो पूर्वाधारमा लगानी गर्ने अध्यक्ष ढकालको लक्ष्य पूरा हुनै लागेको छ । महासंघ अध्यक्षको अबको कार्यकालमा प्रत्येक जिल्ला तथा नगर उद्योग वाणिज्य संघ रहेका स्थानमा उद्यम तथा लगानी बढाउने, रोजगारी केन्द्रित ‘सीप तथा व्यवसाय प्रवद्र्धन प्रणाली’ विकास गरी साना तथा मझौला उद्योगमा लगानी विस्तार गर्ने लक्ष्य समेत अध्यक्ष ढकालको छ ।

अध्यक्ष ढकालले उद्यम व्यवसाय तथा लगानीगर्दा तीनवटा सिद्धान्तलाई सधै प्राथमिकतामा राख्ने गरेका छन् । पहिलो, आम जनतालाइ सिधै फाइदा वा सेवा पुर्‍याउने, दोस्रो सरकारको प्राथमिकताको क्षेत्र र तेस्रो, व्यावसायिक सम्भावनाको क्षेत्र अध्ययन , अनुसन्धानलाई उनले उच्च प्राथमिकतामा राखेका छन् ।

के भन्छन् नवनिर्वाचित अध्यक्ष ढकाल ?

महासंघको वार्षिक साधारण सभा समारोहमा उनले सरकारलाई अहिले आर्थिक तरलताको यथोचित समाधानको नीति तर्जुमा गर्न वृहत आर्थिक विमर्शका लागि राष्ट्रिय व्यापक छलफलको आयोजना गर्न सुझाव समेत दिएका छन् ।

उनले निजी क्षेत्रको भूमिका सामाजिक समुन्नतिमा अतुलनीय रहेतापनि राज्यले हेर्ने दृष्टिकोणमा सकारात्मक परिवर्तन आउन नसकेको बताउँदै व्यावसायीहरुलाई राज्यले उचित सम्मान र मर्यादा दिनुपर्नेमा जोड दिएका छन् ।

महासंघका नयाँ नेतृत्व ढकालले राज्यको लगानीबिनाको साझेदार बन्ने निजी क्षेत्र तयार रहेको बताउँदै यसका लागि लगानीकर्तामैत्री वातावरण तय गर्न नितीगत अवरोध र झण्झटहरुलाई हटाउनुपर्ने उनको भनाइ थियो ।

समग्र देशको विकासमा राज्य र निजी क्षेत्रबीच अर्थपूर्ण साझेदारीको आश्यकता रहेको जिकिर गर्दै उनले निजी क्षेत्रलाई बाहिर राखेर सरकार एक्लैले द्रूत विकासको जनअपेक्षालाई सार्थक रुप दिन नसक्ने उल्लेख समेत गरे ।

मुलूकको छिट्टै मुहार फेर्ने गरी काम गर्न र स्वदेशमै रोजगारीका लागि अवसर सिर्जना गर्न राज्यले उद्योगि व्यवसायीहरुलाई विश्वासमा लिएर काम गर्नसक्नुपर्नेमा नवनिर्वाचित अध्यक्ष ढकालकाे विशेष जोड छ।