मंगलबार, बैशाख २३ २०८२

मंगलबार, बैशाख २३ २०८२

साईबर सुरक्षामा गम्भिर भएर काम गर्न सम्बन्धित निकायलाई प्रधानमन्त्री दाहालको निर्देशन

साईबर सुरक्षामा गम्भिर भएर काम गर्न सम्बन्धित निकायलाई प्रधानमन्त्री दाहालको निर्देशन

सरकारी कामकारवाहीलाई प्रभावकारी बनाउन मङ्गलबार सिंहदरबारमा नेपाल सरकारका सचिवहरुलाई निर्देशनात्मक सम्बोधन गर्नुहुँदै प्रधानमन्त्री पुष्पकमल दाहाल (प्रचण्ड) । तस्बिरः प्रदीपराज वन्त÷रासस

काठमाडौं । प्रधानमन्त्री पुष्पकमल दाहालले साईबर सुरक्षामा गम्भिर भएर काम गर्न सम्बन्धित निकायलाई निर्देशन दिएका छन् ।

शुक्रबार अपरान्ह प्रधानमन्त्री तथा मन्त्रीपरिषद कार्यालयमा सरोकारवाला मन्त्रालय र चार वटै सुरक्षा निकायका प्रमुखहरुसहितको बैठक बोलाई सो सम्बन्धमा गम्भिर भएर काम गर्न निर्देशन दिएका हुन् ।

साईबर सुरक्षाका कारण राष्ट्रिय सुरक्षामा समेत चुनौति निम्तिन सक्ने भएकाले सरोकारवाल निकायले यसलाई सिरियस भएर प्राथमिकतासाथ काम गर्नुपर्ने कुरामा प्रधानमन्त्री दाहालले निर्देशित गर्नु भएको राष्ट्रिय सुरक्षा परिषद्का राष्ट्रिय सुरक्षा सल्लाहकार शंकरदास बैरागीले जानकारी दिए ।

बैठकमा प्रधानमन्त्री दाहाल समक्ष सञ्चार तथा सूचना प्रविधि मन्त्रालय, नेपाली सेना र नेपाल प्रहरीले साईबर सुरक्षाबारे नेपालमा भईरहेको कामकारबाहीबारे बिफ्रिङ गरेका थिए ।

राष्ट्रिय सुरक्षा सल्लाहकार बैरागीले भने, ‘यो साईबर सुरक्षाका सम्बन्धमा हामीले अहिले के गरिराखेका छौं, कहाँनिर चुनौति छ ? ती चुनौतिहरुलाई सम्बोधन गर्न के गर्नु पर्छ ? भन्ने विषयमा तीन वटा प्रस्तुतीहरु थियो । सञ्चार तथा सूचना प्रविधि मन्त्रालय, नेपाली सेना र नेपाल प्रहरीको यसबारे प्रस्तुति थियो । त्यसमा अहिलेसम्म भएका काम, कारबाहीहरुको समिक्षा भयो । अहिलेको चुनौतिहरुको बारेमा पनि त्यहाँ छलफल भयो । र, आगामी दिनमा के गरेर जाने भन्ने विषयमा त्यहाँ सम्माननीय प्रधानमन्त्रीबाट निर्देशन भएको छ । हामी त्यो निर्देशन बमोजिम नेपालको साईवर स्पेशलाई बलियो बनाउन कानुनी, नीतिगत, संस्थागत के प्रबन्ध गर्नुपर्ने हो ? त्यसको वर्क आउट गरेर छिट्टै एउटा कार्ययोजना अगाडि बढाउँछौं । प्रधानमन्त्रीजीेले यो विषय गम्भिर÷सिरियस भएर सबै निकायहरुले काम गर्नुस् । यो साईबर सेक्युरिटी महत्वपूर्ण विषय हो । राष्ट्रिय सुरक्षामा यसले कुनै पनि चुनौति निम्त्याउन सक्ने भएको हुनाले यसलाई प्राथमिकताका साथ हेर्नुपर्छ भन्ने छ प्रधानमन्त्रीज्यूको ।’

बैठकमा साईबर सुरक्षाको क्षेत्रलाई बलियो बनाउने गरी कानुनी, नीतिगत र संस्थागत प्रबन्ध गर्न एउटा छुट्टै कार्ययोजना बनाएर लागू गर्ने निर्णय पनि गरिएको थियो ।

बैठकमा प्रधानमन्त्री दाहाल, उपप्रधानमन्त्री तथा रक्षामन्त्री पूर्णबहादुर खड्का, उपप्रधानमन्त्री तथा गृहमन्त्री नारायणकाजी श्रेष्ठ, सरोकारवाला मन्त्रालयका मन्त्री र साईबर सुरक्षाको क्षेत्रमा कार्यरत सुरक्षा निकायका प्रमुख तथा विभागका पदाधिकारीहरुको उपस्थिति रहेको थियो ।

सम्बन्धित विषय:
ताजा अपडेट
लोकप्रिय
सम्बन्धित समाचार

© 2025 All right reserved to Sunaulonepal.com | Site By : SobizTrend

© 2025 All right reserved to Sunaulonepal.com | Site By : SobizTrend