काठमाडौँ । गैरआवासीय नेपाली संघ (एनआरएनए) की अध्यक्ष रवीना थापाले पुनःअध्यक्ष पदमै उम्मेदवारीको घोषणा गरेकी छन् । आगामी अक्टोबरमा हुने संघको ११ औँ महाधिवेशनका लागि उनले पत्रकार सम्मेलन गरी औपचारीक रुपमै उम्मेदवारी घोषणा गरेकी हुन् ।

उम्मेदवारी घोषणा गर्दै उनले एनआरएनए ग्लोबल फण्डको महत्वकांक्षी कार्यक्रम सार्वजनिक गरेकी छन् । एनआरएनएको प्रत्येक सदस्यले गर्व महसुस गर्ने यो कोष संघको सबैभन्दा ठूलो कोष हुने उनको दाबी छ । पत्रकार सम्मेलनमा थापाले भनिन्, “म नेतृत्वमा पुगेलगत्तै एनआरएनए ग्लोबल फण्ड स्थापना गरिनेछ, एनआरएनए ग्लोबल फण्ड स्थापना गर्नेछु,जुन नेपाल र नेपालीको समृद्धिका लागि सारथि मात्र होइन, संकट पर्दाको सञ्जीवनीसमेत हुने छ ।”

गत दशौँ महाधिवेशनमा निर्वाचन हुन नसकेपछि अध्यक्ष पदका तीनै जना उम्मेदवारले पालैपालो अध्यक्षका रुपमा काम गर्ने सहमति भएको थियो । एनआरएनएको इतिहासमा पहिलो पटक अध्यक्ष महिलाकारुपमा छोटो अवधि काम गरेको आधारमा निर्वाचित भएर एक कार्यकाल काम गर्न चाहेको उनले बताईन् । अध्यक्ष थापाले भनिन्,“मैले छ महिना कार्यकारी अध्यक्षका रुपमा काम गर्दा उल्लेखनीय काम गरेको छु ।”

एक कार्यकाल पूर्ण अवधि काम गर्न पाएमा संघलाई जीवन्त र गतिशील ढंगले अघि बढाउने र विदेशमा बस्ने प्रत्येक नेपालीले अपनत्व महसुस हुने वातावरण बनाउने छु ।” आफ्नो कार्यकालमा महत्त्वपूर्ण उपलब्धि भएको,गैरआवासीय नेपाली नागरिकताका लागि संसद् र नेपाल सरकारले महत्वपूर्ण निर्णय गरेको,नवौँ राष्ट्रिय खेलकुदमा पहिलोपटक एनआरएनएको टिम सहभागी भई पदक जितेको, संघको काठमाडौँ स्थित कार्यालयको पूर्वाधार विकास,(लिफ्टदेखि घेरा पर्खालसम्म) अपांगमैत्री बनाएको,पोखरामा स्मार्ट शौचालय निर्माण सुरु गरिएको(चाँडै हस्तान्तरण हुने), बिरामीलाई रगत अभाव नहोस् भनेर घुम्ती रक्तसञ्चार बस सुरु गरिएको(तीन प्रदेशमा चाँडै हस्तान्तरण हुने तयारीमा),विदेशमा रहेका नेपालीलाई समस्या परेमा तत्काल जानकारी गराउन २४सै घण्टा खुला रहने हटलाइन सेवा सुरु गरिएको, संघको विधान पहिलोपटक सर्वसम्मतले पास गराएको उनले जानकारी गराइन् ।

संघको अबको नेतृत्व समझदारी, सहकार्य र एकताको पक्षपाती हुनुपर्ने आवश्यकतामा जोड दिँदै अध्यक्ष थापाले यो संयोजनकारी भूमिकामा आफू नै उपयुक्त र सक्षम रहेको दाबी गरिन् । उनले निर्वाचनलाई भड्किलो बनाउन नहुनेमा जोड दिँदै आफू महाधिवेशन प्रतिनिधिले मात्र नभई एनआरएनएका प्रत्येक पञ्जिकृत सदस्यले मतदान गर्न पाउनुपर्ने पक्षमा रहेको कुरा दोहो¥याइन् । विदेशमा रहेका नेपालीको हकहित र समस्यामा सहयोग गर्ने तथा नेपाल र नेपालीको समृद्धिमा काम गर्ने विशुद्ध सामाजिक संस्था हो, यो न त कुनै राजनीतिक भ्रातृ संगठन हो न त कुनै व्यापारिक या व्यावसायिक संस्था नै हो ।
विदेशमा बस्ने नेपाली सबैको अवस्था एउटै नभएको उल्लेख गर्दै खाडीमा काम गर्ने श्रमिक दाजुभाइदेखि विद्यार्थी र सामाजिक तथा आर्थिक हैसियत बनाएका सबैको भावनाको प्रतिनिधित्व हुने नेतृत्वमा उनले जोड दिइन् । साथै विधान विपरीत प्यानल बनाएर निर्वाचनमा जाँदा संघमा मनमुटाव बढेको उल्लेख गर्दै उनले ११औँ महाधिवेशनमा प्यानल पूर्णरूपमा निषेध गरिनुपर्नेमा जोड दिइन् ।

चरम गुटबन्दी, राजनीतिक चलखेल, विवाद र व्यापारीकरणले संघको गरिमा घटेको र गलत सन्देश गएको उल्लेख गर्दै अध्यक्ष थापाले राजनीतिक आग्रह पूर्वाग्रहभन्दा माथि उठी सक्षम, सबल गतिशील र संयोजनकारी नेतृत्व चयन गर्नु पर्छ । नले सो अवसरमा २५ बुँदे घोषणापत्र सार्वजनिक गर्दै संघको संरचनागत सुधारदेखि नेपाल र नेपालीको समृद्धिका लागि नेपाल सरकारसँग सहकार्यका विषय उल्लेख गरिन् । स्वास्थ्य, शिक्षा, पूर्वाधार, पर्यटन सञ्चार, कृषि ऊर्जालगायतका विभिन्न क्षेत्रमा उनको योजना र अवधारणा घोषणापत्रमा समेटिएको छ ।

पत्रकार सम्मेलनमा अध्यक्ष थापाले विदेशमा रहेका नेपालीलाई वंशजकै नागरिकताको निरन्तरतादेखि श्रम स्वीकृति लिएर गएका श्रमिक सरकार सरकार (जिटुजी)बाट जाने नेपाली र विद्यार्थी अनुमतिमा गएका विद्यार्थीहरूलाई केही समस्या परेमा नेपाल सरकारले तत्काल पहल गर्नुपर्ने र यसमा एनआरएनएले निरन्तर समन्वय गरिरहनुपर्ने बताइन । हालसम्म अध्यक्षमा आरके शर्मा,महेश श्रेष्ठ र विनय अधिकारीले उम्मेदवारी सार्वजनिक गरिसकेका छन भने अध्यक्षका अर्का प्रत्याशी बद्री केसीले भने अध्यक्षमा उम्मेदवारी दिने भने पनि हालसम्म सार्वजनिक गरेका छैनन ।