काठमाडौँ । जहाजको दुवैतिरको पंखा नजिकबाट इन्धन चुहिएपछि समिट एयरको जहाज सोमबारदेखि धनगढी विमानस्थलमा ग्राउन्डेड गरिएको छ ।

कैलालीको धनगढीबाट सुदूरपश्चिम प्रदेशको हिमाली जिल्ला बझाङका लागि सोमबार उड्नै लागेको समिट एयरको जहाजको पंखा नजिकबाट इन्धन चुहिएपछि ग्राउन्डेड गरिएको हो ।

नाइन एनएमजी कल साइन भएको उक्त जहाजमा इन्धन चुहिएको बारे जहाजमा रहेका यात्रु अशोकबहादुर सिंहले एयर होस्टेजलाई जानकारी दिएपछि मात्रै चालक दलका सदस्यलाई विमानमा आएको खराबीबारे जानकारी भएको थियो ।

त्यसपछि उड्नै लागेको जहाजको पंखा बन्द गरी उडान रद्द गरिएको धनगढी विमानस्थलले जनाएको छ ।

जहाज ग्राउन्डेड भए लगतै विमानस्थल स्थित अग्नी नियन्त्रकको टोलीले जहाजको निरीक्षण गरेको थियो । काठमाडौँबाट इन्जिनियर आएर बिमानको मर्मत गरिसकेपछि मात्रै उडान हुने समिट एयरले जनाएको छ ।