काठमाडौँ । जनता समाजवादी पार्टी (जसपा) ले लुम्बिनी प्रदेश सरकारबाट मन्त्री फिर्ता बोलाएको छ । पूर्वसहमति अनुसार दुई मन्त्रालय नपाएको भन्दै सो पार्टीले मन्त्री फिर्ता बोलाएको हो ।
पार्टीले मन्त्री फिर्ता बोलाए पछि सरकारमा गएका भण्डारीलाल अहिरले राजीनामा राजीनामा बुझाएका हुन् । उनले शनिबार नै राजीनामा बुझाएका थिए । माओवादी संसदीय दलका नेता समेत रहेका जोखबहादुर महराले २५ चैतमा ४ सदस्यीय मन्त्रिपरिषद् गठन गर्दा जसपाबाट अहिर पनि मन्त्री बनेका थिए ।
६ वैशाखमा मन्त्रिपरिषद् विस्तार गर्दा अहिरले कृषिमन्त्रीको जिम्मेवारी पाए । तर जसपाले पदभार ग्रहण नगर्न निर्देशन दियो । दलकै निर्देशनमा उनले राजीनामा दिएका छन् ।
सरकार गठनका क्रममा मुख्यमन्त्री महराले सहरी विकास तथा पर्यटन र कृषि तथा भूमि व्यवस्था मन्त्रालय जसपालाई दिने लिखित सहमति नै गरेका थिए ।
प्रदेशमा ३ सांसद भएको जसपाले सरकारलाई दिएको समर्थन भने कायमै राखेको छ । ८३ सदस्यीय प्रदेशसभा रहेको लुम्बिनीमा मुख्यमन्त्री महरासँग बहुमत (४४) मत मात्र छ ।