काठमाडौं । राजधानीको पर्यटकीय केन्द्र ठमेलमा गैरआवासिय नेपालको लगानीमा निर्माणाधीन चारतारे आर्या होटल एन्ड स्पा प्रालिको लागत ३४ प्रतिशत बढेको छ । होटलको लागत बढेर १ अर्ब २५ करोड रुपैयाँ पुगेको छ ।

यसअघि होटल बनाउन ९३ करोड ६० लाख रुपैयाँ लगानी हुने अनुमान गरिएको थियो । होटलको लागत ३१ करोड रुपैयाँ बढेको आर्याले जनाएको छ । फर्निचर, फिक्स्चर, फर्निसिङ सामग्री, टिभी र विद्युतीय उपकरणलगायत अन्य परिवर्तनका कारण लागत बढेको होटलले जनाएको छ ।

निर्माणाधीन होटलको ८५ प्रतिशत भौतिक प्रगति भएको छ । यस्तै ७२ प्रतिशत वित्तीय प्रगति भएको आर्याले जनाएको छ । होटलमा बैंकको ९६ करोड रुपैयाँ ऋण र ३० करोड रुपैयाँ संस्थापकको स्वपुँजी (इक्विटी) लगानी भएको छ । आर्यामा ७६ प्रतिशत बैंकको ऋण र २४ प्रतिशत संस्थापकहरुको स्वपुँजी हुने गरी लगानी संरचना बनाइएको छ ।

यसअघि होटलमा ७० करोड २० लाख ऋण र आर्या ग्रुपको २३ करोड ४० लाख रुपैयाँ स्वपुँजी लगानी हुने अनुमान गरिएको थियो । यस्तै आर्यामा २५ प्रतिशत संस्थापक र बाँकी ७५ प्रतिशत बैक ऋण हुने गरी लगानी संरचना तयार पारिएको थियो । लगानी बढेपछि लगानी संरचना परिवर्तन भएको छ ।

अहिलेसम्म ६८ करोड २० लाख रुपैयाँको वित्तीय व्यवस्थापन भइसकेको छ । २३ करोड रुपैयाँ संस्थापकबाट स्वपुँजी लगानी भइसकेको छ । चारतारे आर्याको अत्याधुनिक सुविधासहितको ८० वटा कोठा बन्ने छ । जसमा फुड एन्ड बेभरेज, स्विमिङ पुल, कन्फरेन्स हल, हिटेड ज्याकुजी र स्पालगायत सम्पूर्ण सुविधा होटलमा हुनेछ ।

होटलको लगानीकर्ता गैरआवासिय नेपाली कृष्णप्रसाद सिम्खडा हुन् । उनीसँग आतिथ्य व्यवसायमा २० वर्षभन्दा बढीको अनुभव छ । उनले ग्रिसा अटो, अटो पार्क जापान, एभरेस्ट फुड (जापानको चेन रेस्टुरेन्ट) सञ्चालन गरिरहेका छन् । सिम्खडा आर्यका संस्थापक अध्यक्ष हुन् । उनीसँग जापानमा १४ वटा चेन रेस्टुरेन्ट छन् ।

सिम्खडाको पर्यटन क्षेत्रमा लामो अनुभवका साथै अन्तर्राष्ट्रिय टुर अपरेटरहरूसँग स्थापित नेटवर्क भएकाले होटलको अन्तर्राष्ट्रिय बजारमा पहुँच राम्रो हुने देखिएको छ। जसले गर्दा होटलको आम्दानी बढाउने छ । होटल त्रिभुवन अन्तर्राष्ट्रिय विमानस्थलबाट ६ किलोमिटर दुरीमा छ ।

होटल आर्या सन् २०१८ अक्टोबरमा स्थापना भएको हो । होटल ६ सय १४ वर्गमिटर क्षेत्रफलमा फैलिएको छ। होटलले १ अर्ब ५ करोड रुपैयाँ ऋणको रेटिङ गराएको छ ।