गुठीको समस्या समाधानका लागि सरकारसँग माग

सुनौलो नेपाल

सोमवार , जेठ ६, २०८२

काठमाडौं । नेकपा (माओवादी केन्द्र) का सांसद माधव सापकोटाले गुठीको समस्या समाधानका लागि सरकारसँग माग गरेका छन् ।

प्रतिनिधि सभाको शून्य समयमा बोल्दै सांसद सापकोटाले सिन्धुपाल्चोकमा मात्र एक सय ४६ वटा नाममा दर्ता भएका गुठीहरु समस्यामा भएकाले तत्काल समस्या समाधानका लागि सरकारसँग माग गरेका हुन् । उनले गुठीबाट देशभरका लाखौं नागरिक प्रभावित भएको र ६८ वटा जिल्लामा फरक प्रकृतिको गुठीका समस्या रहेको बताए । उनले गुठीसँग सम्बन्धित विविध समस्याको समाधानका लागि गहनरुपमा अध्ययन गरी तत्काल विधेयक ल्याई समस्या समाधान गर्न सरकारको ध्यानाकर्षण गराए ।

उनले भने, ‘गुठीको पीडा भोग्नेलाई मात्र थाहा छ । यो पीडाबाट देशैभर लाखौं नागरिकहरु प्रभावित छन् । त्यसमा सिन्धुपाल्चोकका मात्रै मेलम्चीको फटकशीला, लिसंखुको अत्तरपुर सिग्रे, बलेफीको फुल्पीङकोट, फुल्पिङडाँडा, मान्खा, त्रिपुरासुन्दरीको तौथली धुस्कुन, बाह्रबिसेको मानेश्वारा, जुगलको गुम्बा, सुनकोशीको पांग्रेटार, टेकानपुर, ठोकर्पा, कालिकालगायतका स्थानहरुमा गुठीसँग सम्बन्धित समस्या छन् । सिन्धुपाल्चोकमा मात्र १४६ वटा नाममा गुठीहरु दर्ता छन् । देशभर ६८ वटा जिल्लाहरुमा फरक प्रकृतिका गुठीका समस्याहरु छन् । त्यसैले म सभामुखमार्फत नेपाल सरकारलाई यससँग सम्बन्धित रहेका विविध समस्याहरुको समाधानका लागि गहिरो अध्ययन गरेर तत्काल गुठी विधेयक ल्याई समस्या समाधान गर्न नेपाल सरकारसँग माग गर्दछु ।’