काठमाडौं । ‘द भ्वाइस अफ नेपालका विजेता किरण गजमेरलाई गृह मन्त्रालयले नेपाल प्रवेश गर्न रोक लगाएको छ । बुधबार नेपाल आएका किरणलाई  त्रिुभवन विमानस्थलबाटै नेपाल प्रवेश गर्न नदिएपछि फेरि अमेरिका नै फर्किएका छन् । 

‘द भ्वाइस अफ नेपाल’ शो जितेको केही हप्तापछि किरण अमेरिका फर्किएका थिए । उनी अमेरिकी नागरिक हुन् । अमेरिकी नागरिकहरुले नेपालमा १ सय ८० दिन भन्दा बढी बस्न नपाइने नियम छ । किरणले यसअघि पनि तोकिएको दिन भन्दा बढी बसेकाले जरिवाना समेत तिरेका थिए । किरण सोमबार कतार एयरको क्युआर ६५० नम्बरको उडानबाट नेपाल आएका थिए ।

किरण गजमेर भ्वाइस अफ नेपाल सिजन(३ को विजेता बनेका  हुन् । ग्रान्ड फिनालेमा प्रतिस्पर्धीहरु ज्वाला राई, आर्यन तामाङ र तारा श्रीष मगरलाई पछि पार्दै गजमेर विजेता बन्न सफल  भएका थिए  ।

टिम प्रमोद का गजमेरले  विजेता भएसँगै उनले नगद २५ लाख रूपैयाँ पनि प्राप्त गरेका थिए  । उनी झापाको खुदुनाबारी शरणार्थी शिविरमा जन्मिएका हुन् । भुटानबाट सर्वस्व त्यागेर उनको परिवार नेपाल आएको थियो ।

हाल अमेरिका बस्दै आएका किरणले भ्वाइसको ट्रफी उचाल्दा आफूले नेपाली नागरिकता पाएजस्तो अनुभव भएको प्रतिक्रिया दिएका थिए  ।