काठमाडौं । सांसद डा. विमला राई पौड्यालले अमेरिकी प्रोग्राम एसपीपी पत्र किन नपठाएको भन्दै प्रधानमन्त्री शेरबहादुर देउवासँग जवाफ माग गरेकी छन् । उनले सरकारले स्टेट पार्टनरसिप प्रोग्राममा भाग नलिने निर्णय गरेपनि अमेरिकालाई पत्र अहिलेसम्म नपठाएको भन्दै प्रश्न गरिन् ।

सांसद राईले ढल्न लागेको सरकार त्यो पनि भूकम्पले आक्रान्त भएको बेला सहयोग हुने आशाले गरिएको सहमति छलफल बिना राजनीतिक नेतृत्व बेखबर बनाएर सहमति हुनु डर लाग्दो कुरा भएको बताइन् ।

उनले भनिन्,‘ अहिलको अवस्थामा प्रधानमन्त्री प्रधानमन्त्री मात्रै नभएर रक्षा र अर्थ मन्त्री पनि हो । स्टेट पार्टनरसिप प्रोग्राम जसरी आयो त्यसरी सेलायो । सरकारले स्टेट पार्नरसिप प्रोग्राममा जाँदैनौ भनेर निर्णय गरेको छ । त्यो स्वागतयोग्य छ । मन्त्रीपरिषद् पत्र लेख्ने भनेको हो तर लेखेको छैन । पत्र कहिले लेखिन्छ किन ढिला भएको प्रश्न सोध्न मन छ । यसले हामीलाई दुईचार वटा सिकाइहरु सिकाएको छ । यो स्टेट पार्नरसिप प्रोग्राममा भएको सैद्धान्तिक सहमति सरकार परिर्वतन हुन लागेको सरकारसँग भएको त्यो सरकार १५ दिनमा गएको थियो । त्यो बेला भूकम्पले देश आक्रान्त भएको र सहयोग हुने आशाले सैद्धान्तिक सहमति भएको पाइन्छ । त्यसपछि बनेको सरकारसँग छलफल नगरी पहिलाकै सरकारसँग भएको सहमतिको मिति राखेर नेपाली सेनाले उत्तर दिएको देखिन्छ । यसमा राजनीतिक नेतृत्व बेखबर भएको देखिन्छ त्यो डरलाग्दो कुरा हो । यस्तो चर्चा हुँदा पनि परराष्ट्र मन्त्रालय बेखबर छ ।’

सांसद राईले अर्थमन्त्री नहटेसम्म सचिव मन्त्रालय नआउने भनेर बिदामा बस्ने र मन्त्री हटेपछि मन्त्रालय आउने र मन्त्रालयमा सिसिटिभी फुटेज नराख्ने छानबिन समितिसँग बोल्न डराउने कर्मचारीलाई के कारबाही भयो प्रधानमन्त्रीले अर्थमन्त्रीको हैसियतमा संसदमा जवाफ दिनुपर्ने बताइन् ।