काठमाडौं । नेपाल चेम्बर अफ कमर्सका अध्यक्ष राजेन्द्र मल्लले हस्तकला व्यवसाय पुस्तान्तरण भएपनि बिस्तार हुन नसकेको बताएका छन् । शुक्रवार ललितपुरमा आयोजित नेपाल हस्तकला महासंघको ४२ औं वार्षिक साधारण सभामा बोल्दै उनले यस्तो बताएका हुन् ।

अध्यक्ष मल्लले हस्तकलाको बिस्तारका लागि आवश्यक काम गर्न सरकारसँग आग्रह गरे । उनले सरकारले राष्ट्रिय नीति बनाएर युवाहरुलाई पार्ट टाइमका लागि काम ल्याउनुपर्ने बताए । उनले हस्तकलाको बिस्तारका लागि अनलाइन प्रक्रियालाई सहज बनाउँदै निर्यात वृद्धि गर्नुपर्ने बताए । अध्यक्ष मल्लले नेपालमा उत्पादित हस्तकलाको प्रवद्र्धनका लागि छुट्टै एक्सपोर्ट हाउसको व्यवस्था गर्नुपर्ने माग गरे ।

उनले भने, ‘हस्तकला व्यवसाय पुस्तान्तरण भएको छ तर यसले व्यापकता पाउन सकेको छैन । त्यसैले व्यापकता दिनका लागि यो व्यवसायलाई व्यापकता गर्न अनुरोध गर्छु । नेपालमा युवाहरुलाई पार्ट टाइमका लागि काम ल्याउनुपर्छ । बिहान बेलुका पढ्नेहरुले फुर्सदको समयमा घरमा नै बसेर काम गर्ने राष्ट्रिय नीति बनाए यो व्यवसाय बढाउन सकिन्छ । हस्तकला व्यवसायलाई निर्यातका लागि अनलाइनको प्रक्रिया खोल्नुपर्छ । कसैले घरमा बसेर हस्तकला सामग्री बनयो, उसले अनलाइन मार्केटबाट युरोप, अमेरिका, लगायतका निर्यात गर्नसक्ने देशमा लैजान पाउनुपर्छ । त्यसले विचौलियाको भुमिका हुँदैन । हस्तकलाको एक्सपोर्ट हाउस र एक्सपोर्ट ग्राम बनाएर त्यहाँ कुनैपनि विदेशी आउँदा घुमाउनुपर्छ । यसले पर्यटकहरु पनि बस्ने दिन लम्बिन्छ । हस्तकलाको प्रवद्र्धन पनि हुन्छ ।’

अध्यक्ष मल्लले निजी क्षेत्रसँग सहकार्य गरेर अघि बढे देशको जिडिपी ग्रोथ ७ प्रतिशतसम्म पुग्ने बताए ।