नेपालगन्ज– उपप्रधान तथा गृहमन्त्री रवि लामिछानेले मुलुकको सुरक्षा नेतृत्व लिएलगत्तै नेपालगन्जमा भने कांग्रेस कार्यकर्तामाथि निर्मम खुकुरी प्रहार भएको छ ।

नेपाली कांग्रेसको भ्रातृ संगठन नेपाल तरुण दल नेपालगञ्ज नगर कार्यसमिति सदस्य अनुराग शाह, उज्ज्वल शाह र शुभम शाहमाथि खुकुरी प्रहार भएको छ । तीनै जनामाथि ज्यान लिनेगरी सांघातिक आक्रमण भएको हो ।

नेपालगन्ज ४ गणेशपुरस्थित आफन्तको घरमा पुगेका बेला उक्त समुहले आइतबार दिउँसो १ बजेतिर आक्रमण गरेको प्रत्यक्षदर्शीले बताए । घाइते तीनै जनाको नेपालगन्ज मेडिकल कलेज शिक्षण अस्पताल नेपालगन्जमा उपचार भइरहेको छ ।

शाहत्रयमाथि भएको आक्रमण सामान्य मानवीयता भन्दा पनि तल्लो स्तरको छ । उनीहरुलाई थिल्थिलो हुने गरी काटिएको छ । आक्रमण गर्ने क्रममा उनीहरू ६ जनाको संख्यामा आएको र भारतीय नम्बर प्लेटको गाडी छाडेर भागेको प्रहरीले जनाएको छ ।

स्रोतका अनुसार सुमन मल्ल, विनोद खड्का, ज्ञानु ओलीलगायतको समूहबाट अपराधीहरु संरक्षित छन् ।

जिल्ला प्रहरी प्रमुख एसपी सन्तोषसिंह राठौरले आक्रमणमा संलग्न चार जनालाई राप्ती पारिबाट पक्राउ गरिएको जानकारी दिए । उनका अनुसार विनय भण्डारी, नारायण डाँगी, प्रकाश रसाइली, र तासे भन्ने प्रकाश थापालाई समातिएको छ । ‘दोषि उम्कन दिँदैनौं,’ उनले भने, ‘अपराधीलाई कानूनअनुसार कारबाही अगाडि बढाउँछौं ।’

तरुण नेतामाथि भएको आक्रमणको सर्वत्र निन्दा भएको छ । तरुण दल बाँकेका सचिव विनोद रिजाल, नेपालगञ्ज सभापति सन्दिपजंग शाह र खजुरा सभापति कोमलराज सिंह ठकुरीले संयुक्त विज्ञप्ती निकालेर विगतमा पनि विभिन्न आपराधिक क्रियाकलापमा संलग्न रहेका आपराधिक गिरोहले तरुण दलका सदस्यहरुमाथि ज्यान लिने गरी आक्रमण गरेको उल्लेख गरेका छन् ।

विज्ञप्तीमार्फत नगरमा निर्वाधरुपमा हिंड्डुल गरी आफ्ना दैनिक गतिविधि सञ्चालन गर्न सक्ने गरी शान्ति सुब्यवस्था कायम गर्न स्थानीय प्रशासनको ध्यानाकर्षण गराइएको छ । पीडितलाई न्याय र दोषीमाथि कडा कारवाही नभए सशक्त आन्दोलनमा उत्रने चेतावनी तरुण दलले दिएको छ ।

नेपाली कांग्रेस बाँकेका सभापति नारायणप्रसाद गौडेलले घटनामा संलग्नहरुलाई कारवाही गर्न प्रहरी प्रशासनको ध्यानाकर्षण गराएका छन् ।