पेस्तोलसहित एक युवक पक्राउ

सुनौलो नेपाल
सोमबार, २९ माघ २०८०

सिराहा। प्रहरीले सिराहाबाट पेस्तोल सहित एकजनालाई पक्राउ गरेको छ । पक्राउ पर्नेमा औरही गाउँपालिका ४ कमलपुर घर भएका २० वर्षीय सरोजकुमार यादव छन् ।

उनको साथबाट कटुवा पेस्तोल बरामद गरिएको जिल्ला प्रहरी कार्यालय सिराहाका डीएसपी रबिन्द्रराज पाण्डेले बताए ।

सिराहा नगरपालिका ७ स्थित सल्हेश मन्दिर नजिकै २२ वर्षीय सन्जीतकुमार र यादव र उनकी बहिनी सन्जीता यादव बस्ने डेरामा गएर सरोजले विवाद गरेका थिए । विवादपछि स्थानीयले प्रहरीलाई खबर गरेका हुन् ।

विवादमा संलग्न सरोजकुमार यादवलाई नियन्त्रणमा लिएर चेकजाँच गर्दा पेस्तोल फेला परेको डीएसपी रबिन्द्रराज पाण्डेले जानकारी दिए । आरोपीबारे प्रहरीले अनुसन्धान गरिरहेको छ ।