काठमाडौं । यती थामसेर्कु ग्रुपले सञ्चालन गरिरहेको गोकर्ण फरेस्ट रिसोर्टले ८० करोड रुपैयाँ लगानीमा अन्तर्राष्ट्रियस्तरको सम्मेलन केन्द्र बनाइरहेको छ । सम्मेलन केन्द्रको अहिलेसम्म १३ प्रतिशत वित्तीय प्रगति भएको छ ।

अहिलेसम्म स्वपुँजी (इक्विटी) २० र बैंकको ऋण ३३ प्रतिशत खर्च भइसकेको छ । निर्माणाधीन सम्मेलन केन्द्र आगामी वर्ष सन् २०२५ को अप्रिलसम्म सञ्चालनमा ल्याउने तयारी गरेको छ । यसअघि यो वर्षको अप्रिलदेखि सञ्चालनमा ल्याउने रिसोर्टले जानकारी गराएको थियो । सम्मेलन केन्द्र निर्माण एक वर्ष पछि धकेलिएको छ ।

ढिलाइ र निर्माण सामाग्रीको भाउ बढेकाले लागत थपिन सक्ने संभावना रहेको रिसोर्टले जानकारी दिएको छ ।

निर्माणाधीन सम्मेलन केन्द्रमा ठूला र साना गरी धेरै हल रहनेछन् । कुनै समस्या आएन र निर्माणजन्य सामग्रीको भाउ नबढे निर्धारित समय र तोकिएको लगानीमा सम्मेलन केन्द्र निर्माण सम्पन्न हुने रिसोर्टले स्पष्ट पारेको छ । सम्मेलन केन्द्रले ७३ करोड ५० लाख रुपैयाँ ऋणको रेटिङ गराएको छ ।

रिसोर्टले ९ महिनामा ३४ करोड ४० लाख रुपैयाँ बराबर व्यापार गरेको छ । २०२३ मा रिसोर्टले ४२ करोड रुपैयाँ व्यापार गरेको थियो । यसैगरी २०२२ मा ३३ करोड ९० लाख, २०२१ मा १२ करोड ७० लाख, २०२० मा २६ करोड २० लाख र कोभिडअघि २०१९ मा ४२ करोड ४० लाख रुपैयाँ व्यापार गरेको थियो ।

सर्वोच अदालतले सर्भिस चार्ज हटाउन निर्देशन दिएपछि ९ महिनामा अपरेटिङ प्रफिट मार्जिन १२ प्रतिशत घटेको छ । यसअघि २३ प्रतिशत थियो । यस्तै सम्मेलन केन्द्रका लागि बैंकबाट ऋण लिनुपर्दा यसको असर परेको रिसोर्टले जनाएको छ ।

पर्यटक आगमन बढेसँगै अकुपेन्सी दर पनि बढेको रिसोर्टले जनाएको छ । यो वर्ष अकुपेन्सी दर बढेर ४३ प्रतिशत पुगेको छ । अघिल्लो वर्ष ३६ प्रतिशत मात्र थियो । कोरोना महामारीअघि अकेपेन्सी दर ७० प्रतिशत बढी थियो । होटलको कोठाको औसत आम्दानी बढेर १८ हजार ९ सय ५३ रुपैयाँ पुगेको छ । कोरोनाअघि १२ हजार ३ सय ५९ रुपैयाँ मात्र थियो ।

सन् १९९५ मा स्थापना भएको बुटिक रिसोर्टमा १ सय कोठा छन् । रिसोर्ट यती थामसेर्कु ग्रुपले भाडामा लिएर सञ्चालन गरिरहेको छ । रिसोर्टमा ४ सय ७० हेक्टर जमिनमा छ । गोकर्णमा गल्फ, हर्स राइडिङ र फरेस्ट वाक सेवा छन् ।

यती एयरलाइन्स र तारा एयरलाइन्स सञ्चालन गरिरहेको ग्रुपले विभिन्न दुर्गम क्षेत्रमा होटल सञ्चालन गरिरहेको छ । ग्रुपले ट्रेकिङ, ट्राभल एजेन्सी, एक्सपिडिसन र लक्जरी होटल तथा रिसोर्ट सञ्चालन गरिरहेको छ। नेपाल ट्रस्टले यती ग्रुपलाई गोकर्ण रिसोर्ट भाडामा सञ्चालन गर्न दिएको हो । रिसोर्ट त्रिभुवन अन्तर्राष्ट्रिय विमानस्थलबाट ९ किलोमिटरको दुरीमा छ ।