काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले मंगलबार बिहान सभामुख देवराज घिमिरेसँग भेट गरेका छन् । भेटमा उनले निलम्बित सांसद् पद फुकुवा गरिदिन आग्रह गरे ।

रवि लामिछानेको आग्रहमा जवाफ दिँदै सभामुख घिमिरेले सांसद पद निलम्बन कानुन अनुसार भएको बताएका छन् । संसद् नियमावलीभन्दा बाहिरका अन्य कानुनका कारण लामिछानेको पद निलम्बनमा परेको र संसद् नियमावलीका आधारमा निलम्बित नभएका कारण फुकुवा गर्न पनि आफूले नमिल्ने उनको धारणा थियो।

सहकारी ठगीको आरोपमा कात्तिक २ गते पक्राउ परेका लामिछानेविरूद्ध संगठित अपराध र सम्पत्ति शुद्धीकरणमा पनि मुद्दा दर्ता भएसँगै पुस ८ गतेदेखि उनको सांसद् पद निलम्बनमा छ ।

मुद्दा चलाइएको कास्की, रूपन्देही, चितवन, काठमाडौं जिल्ला अदालतबाट धरौटीमा छुटेलगत्तै लामिछानेसहित राष्ट्रिय स्वतन्त्र पार्टी (रास्वपा) ले निलम्बन फुकुवाको माग गर्दै आइरहेको छ।