मुख्यमन्त्री कँडेलद्वारा निर्माण व्यवसायीसँग छलफल

सुनौलो नेपाल
सोमबार, ८ बैशाख २०८२

छलफल काँक्रेविहार (सुर्खेत), ८ वैशाखः कर्णाली प्रदेशका दश जिल्लामा अलपत्र परेका योजनालाई सञ्चालन गर्नका लागि कर्णाली प्रदेशका मुख्यमन्त्री यामलाल कँडेल , भौतिक पूर्वाधार तथा सहरी विकासमन्त्री शेरबहादुर बुढा, राज्यमन्त्री गमता विकसहित जिल्लास्थित कार्यालय प्रमुख र निर्माण व्यवसायीहरुको बीचमा छलफल हुँदै । तस्बिरः हेमन्त केसी÷रासस

काँक्रेविहार, सुर्खेत । कर्णाली प्रदेशका मुख्यमन्त्री यामलाल कँडेलले प्रदेशका निर्माण व्यवसायीसँग छलफल गरेका छन् । प्रदेशका दश जिल्लामा वषौँदेखि अधुरै रहेका योजनाको प्रगति निराशाजनक देखिएपछि उनले आज निर्माण व्यवसायीसँग छलफल गरेका हुन।

मुख्यमन्त्री कँडेलले प्रदेशका पूर्वाधार तथा शहरी विकासमन्त्री शेरबहादुर बुढा, जिल्लास्थित कार्यालय प्रमुखसहित निर्माण व्यवसायीसँग छलफल गरेका हुन । ठेक्का लिएर वर्षौँसम्म योजना अधुरै छाड्ने कार्य उचित नभएको उल्लेख गर्दै मुख्यमन्त्री कँडेलले काम नगर्ने भए ठाउँ खाली गर्न व्यवसायीसँग आग्रह गरे।

मन्त्री बुढाका अनुसार कर्णाली प्रदेशका विभिन्न ठाउँमा ३५ योजना अधुरै अवस्थामा छन् । ठूला आयोजना अधुरै रहँदा प्रदेशको विकास निर्माणमा बाधा पुगेकाले सरोकारवाला सबैलाई एकै ठाउँमा राखेर छलफल गरिएको उनले बताए।

मुख्यमन्त्री कँडेलले चालु आर्थिक वर्षको समय अझै बाँकी रहेकाले तीव्र गतिमा काम गर्न व्यवसायीसँग आग्रह गरे। प्रदेश सरकार निर्माण व्यवसायीलाई परेको मर्का र समस्या हल गर्न तयार रहेको उनको भनाइ थियो ।