सर्लाहीमा माटो खन्ने क्रममा ढिस्को खस्दा ३ बालबालिकासहित ४ को मृत्यु

सुनौलो नेपाल

बुधवार , आश्विन १५, २०८२

सर्लाहीमा माटो खन्ने क्रममा ढिस्को खस्दा ३ बालबालिकासहित ४ को मृत्यु

सर्लाही । हरिपुर्वा नगरपालिका–१, हर्दी नदी किनारमा माटो खन्ने क्रममा बुधबार बिहान ढिस्को खस्दा चार जनाको ज्यान गएको छ। मृत्यु हुनेमा महोत्तरी सोनमा गाउँपालिका–६ की ६५ वर्षीया सायदा खातुन, ६ वर्षीया सविवा खातुन, ८ वर्षीय डिल्लु मंसुर र ९ वर्षीया नर्गिस खातुन रहेका छन्।

घटनाको प्रारम्भिक विवरण अनुसार बुधबार बिहान करिब ९:२० बजे चारै जना माटो खन्ने क्रममा ढिस्कोमा पुरिएका थिए। घटनास्थलको जानकारी पाएलगत्तै प्रहरी चौकी हरिपुर्वाबाट खटिएको टोलीले घाइतेहरूलाई उद्धार गरी प्रादेशिक अस्पताल मलंगवा पुर्‍याएको थियो। तर अस्पतालले करिब पौने ११ बजे चारै जनालाई मृत घोषणा गरेको जिल्ला प्रहरी कार्यालय सर्लाहीले जनाएको छ।

प्रहरीका अनुसार घटनास्थल प्रहरी चौकी हरिपुर्वाबाट करिब २.५ किलोमिटर पूर्वतर्फ पर्दछ। घटनाको थप अनुसन्धान गर्न सिंहको नेतृत्वमा ११ सदस्यीय टोली खटाइएको छ। प्रारम्भिक अनुसन्धानले ढिस्को खस्ने कारण भूस्खलन वा माटो खन्ने क्रममा सुरक्षा मापदण्ड नअपनाउनु भएको हुन सक्ने आशंका गरिएको छ।

स्थानीयवासीहरूले क्षेत्र सुरक्षित नबनाएसम्म यस्ता दुर्घटनाको जोखिम उच्च रहेको र प्रशासनले सतर्क रहनुपर्ने बताए। घटना पश्चात परिवार र छिमेकवासी शोकमा डुबेका छन्।