एजेन्सी ।  बेलायतमा पछिल्लो समय कोरोना सङ्क्रमण दर बृद्धि भएको छ । बुधबार सार्वजनिक गरिएको तथ्यांकअनुसार यहाँ एकै दिनमा ३० हजार भन्दा बढी नयाँ सङ्क्रमित थपिएका छन् । 

यहाँको ‘डिपार्टमेन्ट अफ हेल्थ एण्ड सोशल केयर’ ले दिएको जानकारीअनुसार गएको बुधबार ३० हजार ५९७ जना नयाँ सङ्क्रमित थपिएका हुन् । सङ्क्रमित हुनेको संख्या अघिल्लो हप्ताको तुलनामा निकै बढी हाे । 

हालसम्म बेलायतमा कुल सङ्क्रमितको संख्या ७३ लाख १२ हजार ३७१ पुगेको छ । यहाँ केही दिनयता खुकुलो गरिएको लकडाउनपछि सङ्क्रमित संख्या दैनिक उकालो लाग्दै गएको हो । 

पछिल्ला केही दिनमा बेलायतमा दैनिक मृत्यु हुनेको संख्यामा पनि बृद्धि भएको पाइएको छ । बेलायतमा कोरोनाका कारण हालसम्म एक लाख ३४ हजार भन्दा बढीको मृत्यु भइसकेको अन्तर्राष्ट्रिय सञ्चारमाध्यमहरुले जनाएका छन् ।