वस्तु व्यापार कारोबार गर्नेहरु मध्ये आर्थिक वर्ष ०७९/८० को आय विवरणअनुसार सबैभन्दा बढी कर दाखिला गरेपछि यो वर्ष पनि बढी कर तिरेको भन्दै सरकारले भाटभटेनी सुपरमार्केटलाई सम्मान गरेको छ । भाटभटेनीले वर्षेनी सरकारलाई बढी कर बुझाउँदै आएको छ ।

सरकारलाई बढी कर बुझाउनुका साथै भाटभटेनीले लगानी पनि विस्तारका साथै ठूलो संख्यामा रोजगारी पनि सिर्जना गरिरहेको छ । आउँदो पाँच वर्षमा आउटलेटको संख्या बढाएर ५१ पुर्याउने लक्ष्य भाटभटेनीले राखेका छन् । भाटभटेनी अहिले वस्तु व्यापारमा मात्र केन्द्रीत नभइ लगानी विविधिकरणमा लागेको छ ।

झण्डै ८ अर्ब रुपैयाँ लगानीमा राजधानीको दरवारमार्गमा पाँचतारे अन्नपूर्ण होटल निर्माण सुरु गरेको छ । होटलको सोमबार शिलान्यास भएको छ । भाटभटेनीको सेवा विस्तार र लगानी विविधिकरणको विषयमा केन्द्रीत रहेर अध्यक्ष मीनबहादुर गुरुङसँग सुनौलो नेपालले गरेको कुराकानी ।

यहाँले मुलुककै सबैभन्दा ठूलो पाँचतारे होटलको आज शिलान्यास भयो । पूर्वाधार निर्माणको काम कहिलेदेखि सुरु हुन्छ ?

अहिले अन्नपूर्णको पुराना भवनहरु भत्काउने काम भइरहेको छ । भवन भत्काइसकेपछि होटलका लागि नयाँ भवन निर्माण सुरु हुनेछ । काठमाडौं महानगरपालिकाले जति चाँडो काम सुरु गर्न अनुमति दिन्छ, त्यही आधारमा होटलको निर्माण सुरु हुनेछ ।

कस्तो खालको होटल बन्दै छ ?

दरबारमार्गमा ठूलो पाँचतारे होटल बन्दै छ । पहिला त होटल नै हुनेछ । होटलपछि दोस्रो परियोजना अगाडी आर्केड हुनेछ । होटल र आर्केड दुबै अलग हुनेछ । ४२ रोपनीमा फैलिने होटल परियोजनामा सर्भिस अपार्टमेन्ट पनि हुनेछ ।

होटलमा कति कोठा र के के सुविधा हुनेछन् ?

होटलमा साढे तीन सय कोठाहरु हुनेछन् । २५ सय, २ हजार र १५ सय मान्छे अटाउने बैंक्वेट हल हुने छन् ।

नेपालमा महंगा होटल भएनन्, खर्च गर्न आउने पर्यटकलाई खर्च गर्न पाएनन भन्ने सुनिन्छ । त्यस्ता खालका कोठा होटलमा हुन्छन कि हुँदैनन् ?

होटलमा धेरै राम्रा कोठाहरु हुनेछन् । रिजनेवल प्राइसका हुनेछन् । भाटभटेनीको जुन मोडेल छ, त्यही मोडेलमा होटलको मूल्य हुनुपर्छ भन्ने मेरो बुझाइ छ ।

कहिलेसम्म निर्माण सम्पन्न हुनेछ ?

अगाडी बन्ने आर्केडको काम आउँदो डेढ वर्षमा तयार भइहाल्छ भने होेटल बनाउन अढाइ वर्ष लाग्नेछ । यहाँले स्थापना गर्नु भएको भाटभटेनी सुपरमार्केटको यात्रा एकदमै राम्रो छ । बन्न लागेको होटल पनि पक्कै राम्रो होला ।

यसका लागि के कस्तो तयारी रहेको छ ?

मेरो बुझाइमा मुलुकमा बेरोजगारी संख्या धेरै छ । स्वदेशमै ठूलो संख्यामा रोजगारी सिर्जना गर्नुपर्ने आवश्यकता छ । धेरै युवाहरु मुलुक बाहिर रोजगारीका लागि जानु भएको छ । त्यसैले उहाँहरुलाई नेपालमै रहने वातावरण हामीले बनाउनुपर्छ । नेपालमा संभावना छ, काम गरे यहाँ नै हुन्छ भन्ने सन्देश पनि जाओस भनेर हामीले होटल निर्माणको सुरुवात गरेका हौं । भाटभटेनी समूह, लिटिल एन्जल्स समूह र अन्नपूर्ण गरी तीन समूह मिलेर ठूलो लगानीमा होटल निर्माण सुरु गरेका छौं । यो परियोजना राम्रो हुने हामीले आशा गरेका छौं ।

होटलको व्यवस्थापन कस्ले गर्ने भएको छ ?

होटलको व्यवस्थापन भारतको आइटिसी ग्रुपको वेलकम ब्राण्डले गर्ने भएको छ । भाटभटेनी सुपरमार्केट उत्कृष्ठ करदाता बन्दै आएको छ । यो वर्ष पनि सरकारबाट सम्मान पाएको छ ।

कसरी यो सम्भव भयो ?

भाटभटेनीको मुल उद्धेश्य दुईटा छन् । एउटा रोजगारी सिर्जना गर्ने र अर्को राज्यलाई बढी भन्दा बढी कर बुझाउने हो । मुुलुक चलाउन राजस्व आवश्यक छ । त्यसैले हामी सबै व्यवसायीले दत्तचित्त लगाएर सरकारलाई बढी भन्दा बढी कर बुझाऔं भन्ने हो । यसमा मेरो बुझाइ अझ फरक पनि छ । देश बनेन भने हामी बन्न सक्दैनौं । देश सम्पन्न भएन भने हामी पनि सम्पन्न हुँदैनौं । त्यसैले मुलुक सम्पन्न हुन राजस्व संकलन बढ्नुपर्छ ।

म हाम्रा सबै व्यवसायी मित्रहरुलाई आफ्नो कारोबार पारदर्शी बनाएर राज्यलाई बढी भन्दा बढी कर बुझाउन म विनम्र अनुरोध गर्दछु ।

नयाँ कतिवटा भाटभटेनी आउटलेटहरु आउँदैछन् ?

आउँदो पाँच वर्षमा भाटभटेनी सुपरस्टोरको संख्या बढाएर ५१ पुर्याउने भएका छौं । हामीले बनाउन लागेको आर्केटको पहिलो तल्लामा ब्रान्डेड वस्तुहरु उपलब्ध हुने छ भने यहाँ पनि भाटभटेनीको उपस्थिती रहने छ ।

यो पनि :

भाटभटेनी र लिटिल एन्जल्स समूहले ८ अर्बमा पाँचतारे अन्नपूर्ण होटल बनाउँदै, व्यवस्थापन आइटिसीले हेर्ने