काठमाडौ । नेपाल सरकारले म्यानमारमा हालै गएको भूकम्पका पीडितहरुका लागि खाद्यान्न लगायतका सहायता सामग्री पठाउने भएको छ । मन्त्रिपरिषदको सोमबारको बैठकले सो निर्णय गरेको हो ।

परराष्ट्र मन्त्रालयको समन्वयमा तत्कालका लागि सहयोग पुग्नेगरी चाउचाउ, विस्कुटलगायतका खाद्यान्न, औषधि तथा ब्लांकेट आदि सहायता सामग्रीहरु म्यानमार पठाइने भएको हो । सोमबार मन्त्रालयमा आयोजित यस सम्बन्धी बैठकमा परराष्ट्र मन्त्री डा आरजु राणा देउवाले सहायता सामग्री सहयोगका लागि नेपालका निजी क्षेत्रका संघसंस्थाहरुलाई पनि आह्वान गरिन् ।

उनले अप्ठेरोमा परेका म्यानमारका जनतालाई तत्कालका लागि आवश्यक सहयोग पुग्नेगरी मानवीय सहायता एवं राहातस्वरुप नेपाल सरकारले सामग्री पठाउने जानकारी दिइन् ।

सो बैठकमा उपस्थित नेपाल उद्योग वाणिज्य महासंघका अध्यक्ष चन्द्रप्रसाद ढकाल, सिएनआइका अध्यक्ष राजेश अग्रवाललगायतले निजी क्षेत्रका तर्फबाट संस्थागत रुपमा सहायता सामग्री उपलब्ध गराउने जानकारी दिए । बैठकमा परराष्ट्र सचिव अमृतबहादुर राइ, गृह सचिव गोकर्णमणि दुवाडी, अर्थ सचिव घनश्याम उपाध्यायले सहायता सामग्रीहरु जम्मा गरेर परराष्ट्र मन्त्रालय मार्फत् जतिसक्दो चाँडै म्यानमार पठाइने बताए ।

म्यानमारमा यही चैत १५ गते गएको ७।७ रेक्टर स्कलेको भूकम्पबाट ठूलो जनधनको क्षति भएको छ ।