काठमाडौं । नेपाल सरकार र नेपाल कम्युनिष्ट पार्टी विप्लव समूहबीच तीन बुँदे सहमति भएसँगै प्रधानमन्त्री केपी शर्मा ओली र नेत्रविक्रम चन्द विप्लव एउटै देखिने भएका छन् । प्रधानमन्त्री ओली र विप्लवले शुक्रबार दिउँसो २ बजे एउटै मञ्चबाट संयुक्त सम्बोधन गर्ने भएका हुन् ।
फागुन २१ गते तीन बुँदे सहमति सार्वजनिक गर्न आयोजित समारोहलाई प्रधानमन्त्री ओली र नेकपा महासचिव विप्लवले सम्बोधन गर्नेछन् । सरकारी वार्ता टोलीका सदस्य राजन भट्टराईका अनुसार राष्ट्रिय सभागृहमा विशेष समारोह आयोजना हुने छ । सरकार र विप्लव समूहबीच मंगलबार दुई चरणमा वार्ता भएको थियो ।
वार्तामा सरकारका तर्फबाट गृहमन्त्री रामबहादुर थापा संयोजक र प्रधानमन्त्री केपी शर्मा ओलीका परराष्ट्र सल्लाहकार राजन भट्टराई सहभागी थिए भने चन्द समूहका तर्फबाट खड्गबहादुर विश्वकर्मा र उदयबहादुर चलाउने रहेका थिए ।