एकै परिवारका १६ जना बेपत्ता, अनुसन्धान गर्दै प्रहरी

सुनौलो नेपाल

सोमवार , श्रावण १२, २०८२

एकै परिवारका १६ जना बेपत्ता, अनुसन्धान गर्दै प्रहरी

काठमाडौं । सिन्धुलीको गोलन्जोर गाउँपालिका–६ स्थित छेत्पा नजिक भण्डास बिप्पर कटेरी भन्ने ठाउँमा बसोबास गर्दै आएका एकै परिवारका १६ जना बेपत्ता भएका छन् ।

गाउँबाट उर्मिला हायुको परिवार नै हराएपछि प्रहरीले खोजतलास सुरु गरेको छ । वडाध्यक्ष रबिन श्रेष्ठले सामाजिक सञ्जालमा पोस्ट गरेर त्यसको जानकारी दिएका छन्।

उनले घरमा चौपायामात्रै अलपत्र छाडेर परिवारका सबै सदस्य सम्पर्कविहीन भएको बताएका छन्।

हायु परिवारले सीमान्तकृत समुदायको सदस्यका रूपमा पाउने एक वर्षको भत्ता चार दिनअघि मात्र एकमुष्ट बैंकबाट बुझेका थिए ।

घटनास्थलमा रहेका वडाध्यक्ष श्रेष्ठका अनुसार हायुको घरमा बाँधेका गाइबस्तु, कुखुरा बाख्रा पनि छन् । उनले भने, ‘तीन दिनअघि बोको पनि बेचेका रहेछन्। घरमा अलिकति आगो लागेको छ । आफ्नै घरमा पालेको सुँगुर काटेर भत्ता आएको दिन खाएका रहेछन् ।’