‘जेनजी’को भ्रष्टाचारविरोधी प्रदर्शनलाई कुलमान घिसिङको पनि साथ, जनाए ऐक्यबद्धता

सुनौलो नेपाल

सोमवार , भाद्र २३, २०८२

‘जेनजी’को भ्रष्टाचारविरोधी प्रदर्शनलाई कुलमान घिसिङको पनि साथ, जनाए ऐक्यबद्धता

काठमाडौं । उज्यालो नेपाल अभियानका अभियन्ता तथा नेपाल विद्युत प्राधिकरणका पूर्वकार्यकारी निर्देशक कुलमान घिसिङले सोमबार हुने जेनजी पुस्ताको भ्रष्टाचारविरोधी प्रदर्शनलाई समर्थन जनाएका छन् ।

सामाजिक सञ्जालमार्फत घिसिङले सरकारले सामाजिक सञ्जाल बन्द गर्ने निर्णयको विरोध गर्दै उक्त कदम लोकतान्त्रिक मूल्यविरुद्ध भएको टिप्पणी गरेका छन् । उनले जेनजी पुस्ताले निकाल्ने जुलुसमा उज्यालो नेपाल अभियानको पूर्ण ऐक्यबद्धता रहने बताए ।

हालै खाडी मुलुक, युरोप र अमेरिकाको भ्रमणपछि स्वदेश फर्किएका घिसिङले नेपालमा बत्तीको मात्र नभई सुशासन र समृद्धिको उज्यालो ल्याउन ‘उज्यालो नेपाल अभियान’ सुरु गरिएको बताएका थिए । उनका अनुसार, लाखौं युवा विदेश पठाएर देशले प्रगति गर्न सक्दैन, बरु स्वदेशमै रोजगारी सिर्जना गर्नुपर्ने आवश्यकता छ ।

घिसिङले देशमा निराशा फैलिएको भए पनि युवाले स्वदेशमै सम्भावना खोज्नुपर्नेमा जोड दिंदै, उज्यालो नेपाल अभियानले आशा र आत्मविश्वास जगाउने विश्वास व्यक्त गरेका छन् ।