फ्रान्समाथि इंग्ल्यान्डको ६-४ को सनसनीपूर्ण जित, शाकाको ह्याट्रिकसँगै खोस्यो तेस्रो स्थान

सुनौलो नेपाल

आइतवार , श्रावण ३, २०८३

फ्रान्समाथि इंग्ल्यान्डको ६-४ को सनसनीपूर्ण जित, शाकाको ह्याट्रिकसँगै खोस्यो तेस्रो स्थान

काठमाडौं । बुकायो शाकाको सानदार ह्याट्रिकको मद्दतले फ्रान्सलाई ६–४ गोलअन्तरको रोमाञ्चक खेलमा पराजित गर्दै इंग्ल्यान्डले फिफा विश्वकप २०२६ मा तेस्रो स्थान हासिल गरेको छ ।

मियामी स्टेडियममा आइतबार बिहान सम्पन्न निकै प्रतिस्पर्धात्मक खेलमा इंग्ल्यान्डलाई ऐतिहासिक जित दिलाउन शाकाले तीन गोल गरे भने डेक्लान राइस, एज्री कोन्सा र जुड बेलिंघमले एक–एक गोल थपे ।

खेलको सुरुवातमै आक्रामक बनेको इंग्ल्यान्डले तेस्रो मिनेटमा डेक्लान राइसको गोलबाट अग्रता लिएको थियो । १८औं मिनेटमा एज्री कोन्साले हेडरमार्फत गोल गर्दै टोलीको अग्रता दोब्बर बनाए । त्यसपछि पहिलो हाफको ३७औं मिनेट र इन्जुरी समयमा बुकायो शाकाले लगातार दुई गोल गरेपछि इंग्ल्यान्ड पहिलो हाफमै ४–० को बलियो स्थितिमा पुगेको थियो ।

तर, दोस्रो हाफमा फ्रान्सले उत्कृष्ट पुनरागमनको प्रयास गर्‍यो । फ्रान्सेली कप्तान किलियन एमबाप्पेले ४८औं मिनेटमा पहिलो गोल फर्काए भने ५४औं मिनेटमा ब्राडली बारकोलाले अर्को गोल थपे । ६६औं मिनेटमा एमबाप्पेले व्यक्तिगत दोस्रो गोल गरेपछि खेल ४–३ को रोमाञ्चक मोडमा पुग्यो ।

खेलको उत्तरार्धमा दुवै टोलीबाट आक्रामक खेल जारी रह्यो । ८७औं मिनेटमा प्राप्त पेनाल्टीलाई सदुपयोग गर्दै शाकाले आफ्नो ह्याट्रिक पूरा गरे र इंग्ल्यान्डलाई ५–३ को अग्रता दिलाए । इन्जुरी समयमा फ्रान्सका उस्मान डेम्बेलेले गोल गर्दै खेललाई ५–४ मा पुर्‍याए पनि त्यसलगत्तै जुड बेलिंघमले गोल थपेपछि इंग्ल्यान्डले ६–४ को जित सुनिश्चित गर्‍यो ।

सन् १९६६ मा विश्वकप उपाधि जितेयता इंग्ल्यान्डले फिफा विश्वकपमा हात पारेको यो नै सबैभन्दा उत्कृष्ट नतिजा हो । यसअघि सन् २०१८ को विश्वकपमा इंग्ल्यान्ड चौथो स्थानमा सीमित भएको थियो ।