धनगढी । सुदूरपश्चिम प्रदेश सरकारले अगामी आर्थिक वर्षको नीति तथा कार्यक्रम बुधबार (आज) ल्याउँदैछ ।

आन्तरिक मामिला तथा कानूनमन्त्री पृथ्वीबहादुर सिंहका अनुसार आजको प्रदेश सभाको बैठकमा अगामी आर्थिक वर्ष २०८०/०८१ को नीति तथा कार्यक्रम प्रस्तुत गर्ने तयारी गरिएको हो ।

उनले नीति तथा कार्यक्रम स्वीकृत गर्न अहिले मन्त्रिपरिषद्को बैठक चलिरहेको जानकारी दिए ।

मन्त्रिपरिषद्बाट नीति तथा कार्यक्रम पारित भएपछि प्रदेश प्रमुख देवराज जोशीलाई बुझाइने र उनले प्रदेश सभामा सरकारको नीति तथा कार्यक्रम प्रस्तुत गर्ने कार्यसूची रहेको बताइएको छ ।

सरकारले अगामी वर्षको नीति तथा कार्यक्रम सार्वजनिक गर्न १५ दिन अगाडि नै नीति तथा कार्यक्रम ल्याउनु पर्ने भएतापनि सुदूरपश्चिममा भने ढिलाइ भएको हो ।

असार १ गते अगामी आर्थिक वर्षको बजेट ल्याउनुपर्ने संवैधानिक प्रावधान रहेको छ ।

काँग्रेसका कमलबहादुर शाह नेतृत्वमा रहेकाे सरकारले पहिलो पटक नीति तथा कार्यक्रम ल्याउन लागेको हो ।