डोल्पा । मौसममा सुधार आएसँगै जुफाल विमानस्थलमा हवाई सेवा सुचारु भएको छ । अविरल बर्षाका कारण नेपालगन्ज डोल्पा आउने विमानको आकाशी मार्ग अवरुद्ध भई छब्बीस दिनसम्म हवाई सेवा बन्द भएको थियो ।

मौसममा सुधार आई आकाश खुलेसँगै बुधवार नेपालगन्जबाट डोल्पाको लागि तारा एयरलाइन्सको विमानले एउटा उडान भरेको हो ।

तारा एयरलाइन्सको नेपालगन्ज डोल्पाको टिकट लिनु भएकी डोल्पा त्रिपुरा सुन्दरी नगरपालिका–१ त्रिपुरा कोटकी देवकी उपाध्यायले बल्लबल्ल आकाश खुलेपछि छब्बीस दिनपछि डोल्पामा आउन पाएको बताइन् ।

नेपाल नागरिक उड्डयन प्राधिकरण जुफाल डोल्पाका प्रमुख अमित कुमार चौरासियाले मौसममा सुधार आएपछि उडान भएको तर प्राधिकरणले बिहान ६ बजेपछि दिउसो १२ बजे सम्म मात्र उडान गरिने गरी बनाएको मापदण्डमा फेरबदल नभएको बताए ।

लगातारको बर्षाका कारण देशभरका २९ ओटा विमानस्थलमा हवाई उडानमा कडाइ गरिएको थियो। करिब एक महिना सम्म हवाई उडान नहुँदा बिरामी असक्त र अत्यावश्कीय काममा नेपालगन्ज झर्नु पर्ने कर्मचारी र सर्वसाधारणले सास्ती खेप्नुपरेको थियो ।