काठमाडौँ । चालु आर्थिक वर्ष २०८०/८१ को तेस्रो त्रैमासिक अवधिसम्ममा मुलुकले साढे १० खर्ब रुपैयाँ भन्दा बढीको व्यापार घाटा व्यहोरेको छ ।

भन्सार विभागले सार्वजनिक गरेको तथ्याङ्कअनुसार गत चैत मसान्तसम्ममा कूल १२ खर्ब ८१ अर्ब ३१ करोड ५८ लाख रुपैयाँ बराबरको वैदेशिक व्यापार गर्दा नेपालले १० खर्ब ५३ अर्ब ४२ करोड ३८ लाख रुपैयाँ घाटा व्यहोरेको हो ।

चालु आर्थिक वर्षको नौ महिना अवधिमा ११ खर्ब ६७ अर्ब ३६ करोड ९८ लाख रुपैयाँ बराबरको आयात र एक खर्ब १३ अर्ब ९४ करोड ६० लाख रुपैयाँ बराबरको निर्यात भएको विभागको तथ्याङ्कबाट देखिन्छ ।

चालु आर्थिक वर्षको तेस्रो त्रैमासिक समीक्षा अवधिसम्ममा गत आर्थिक वर्षको सोही अवधिको तुलनामा आयात दुई दशमलव ८४, निर्यात तीन दशमलव ६६, व्यापार घाटा दुई दशमलव ७५ र समग्र वैदेशिक व्यापार दुई दशमलव ९२ प्रतिशतले घटेको छ ।

गत आर्थिक वर्षको सुरुआती नौ महिना अवधिमा मुलुकले कूल १३ खर्ब १९ अर्ब ७८ करोड ८९ लाख रुपैयाँ बराबरको वैदेशिक व्यापार गर्दा १० खर्ब ८३ अर्ब २२ करोड ९० लाख रुपैयाँ बराबर व्यापार घाटा ब्यहोरेको थियो ।

नेपालले सबैभन्दा ठूलो वैदेशिक व्यापार गर्ने छिमेकी मुलुक भारतसँग मात्र यो अवधिमा छ खर्ब ५१ अर्ब ८० करोड रुपैयाँ व्यापार घाटा ब्यहोरेको छ । भारतबाट सात खर्ब २९ अर्ब ६५ करोड ८५ लाख रुपैयाँ बराबरको वस्तु आयात हुँदा ७७ अर्ब ८५ करोड ५२ लाख रुपैयाँ बराबरको निर्यात भएको छ ।

त्यस्तै, अर्को छिमेकी मुलुक चीनसँग दुई खर्ब १६ अर्ब ७६ करोड ९५ लाख रुपैयाँ बराबरको आयात गर्दा दुई अर्ब ११ करोड ४४ लाख रुपैयाँ बराबरको मात्रै निर्यात भएको छ । चीनसँगको व्यापार घाटा दुई खर्ब १४ अर्ब ६५ करोड रुपैयाँ बराबर छ ।

नेपालले गर्ने वैदेशिक व्यापारमा बढी घाटा देखिएको मुलुकमा संयुक्त अरब इमिरेट्स (युएई) तेस्रो स्थानमा छ । युएईबाट २० अर्ब ४८ करोड सात लाख रुपैयाँ बराबरको आयात हुँदा एक अर्ब ९५ करोड ७९ लाख रुपैयाँ बराबरको मात्रै निर्यात भएको छ । युएईसँगको व्यापारघाटा १८ अर्ब ५२ करोड २७ लाख रुपैयाँ बराबर छ ।

त्यसैगरी, नेपालले बढी व्यापार घाटा व्यहोरेका मुलुकमा युक्रेन चौथो, मलेसिया पाँचौँ र अस्ट्रेलिया छैटौँ स्थानमा छन् । यी मुलुकसँगको व्यापारघाटा क्रमश: १४ अर्ब ९० करोड, १४ अर्ब १६ करोड र नौ अर्ब पाँच करोड रुपैयाँ रहेको छ ।

नेपालले ३२ वटा मुलुकसँगको वैदेशिक व्यापारमा नाफा कमाएको छ । सबैभन्दा धेरै व्यापार नाफा डेनमार्कसँग देखिएको छ ।

डेनमार्कमा नेपालले २८ करोड ७७ लाख ७१ हजार रुपैयाँ बराबरको आयात र ६७ करोड ८३ लाख ७५ हजार रुपैयाँ बराबरको निर्यात गर्दा ३९ करोड छ लाख तीन हजार रुपैयाँ बराबर व्यापार नाफा कमाएको छ ।

त्यस्तै, अफगानस्तानसँग १८ करोड नौ लाख, नर्वेसँग १० करोड ८४ लाख र सुडानसँग तीन करोड ४३ लाख रुपैयाँ व्यापार नाफा देखिएको छ ।