काठमाडौं । मुलुकको पायोनियर फिनटेक कम्पनी एफ वान सफ्ट इन्टरनेसनल प्रालिको व्यापार बढेको छ । एक वर्षमा एफ वान सफ्टले १२ अर्ब ८४ करोड रुपैयाँ डिजिटल कारोबार गरेको छ । अघिल्लो वर्ष कम्पनीले १२ अर्ब १९ करोड ५० लाख रुपैयाँ डिजिटल कारोबार गरेको थियो ।

एक वर्षमा कम्पनीको डिजिटल कारोबार ५.२८ प्रतिशत अर्थात साढे ६४ करोड रुपैयाँ बढेको सार्वजनिक गरिएको वित्तीय विवरणले देखाएको छ ।

२०२२ मा एफ वान सफ्टले १५ अर्ब ६४ करोड रुपैयाँको कारोबार गरेको थियो । २०२१ मा एफ वानले ११ अर्ब ७८ करोड रुपैयाँ व्यापार गरेको थियो । यस्तै कम्पनीले २०२० मा ८ अर्ब ५ करोड र २०१९ मा ५ अर्ब ६३ करोड ७० लाख रुपैयाँको कारोबार गरेको थियो ।

डिजिटल कारोबार बढ्दै गएकाले कम्पनीको नाफा राम्रो देखिएको छ । एफ वान सफ्टको राम्रो लाभांश ८० प्रतिशत लगानी भएको सहायक कम्पनी इसेवाबाट प्राप्त हुने गरेको छ । यस्तै अर्को सहायक कम्पनी पेमेन्ट गेटवे फोन पेको खुदनाफा ८ सय ४० प्रतिशत बढेको सार्वजनिक गरिएको वित्तीय विवरणमा उल्लेख छ ।

नाफाबाट कम्पनीले २ सय र १ सय प्रतिशत लाभांश वितरण गरेको छ । एफ वान सफ्टले २०२३ मा ४८ प्रतिशत अन्तरिम लाभांश भुक्तानी गरेको छ ।

कुल कारोबारमा ब्लक एसएमएस र डिजिटल टपअपको बिक्री हिस्सा ९८ प्रतिशत रहेको छ । डिजिटल वालेट र पेमेन्ट गेट वे मा राम्रो उपस्थिती रहेको छ । कम्पनीले ८१ करोड १२ लाख रुपैयाँ ऋणको रेटिङ गराएको छ ।

कम्पनीले नेपालका बैंक तथा वित्तीय संस्थामा मोबाइल बैंकिङ र इन्टरनेट बैंकिङ प्रणाली विकास गरेको छ । ५४ मध्ये ४५ बैंक तथा वित्तीय संस्थामा एफ वान सफ्टको मोबाइल र इन्टरनेट बैंकिङ सफ्टवयेरबाट बैंकिङ कारोबार भइरहेको छ ।

मोबाइल र इन्टरनेट सेवा प्रदायक कम्पनीहरुको फोन ब्यालेन्स र अन्य उपयोगिताहरू साथै बल्क एसएमएस सेवाहरूको डिजिटल टपअपको व्यापारमा एफ वान संलग्न छ । फिनटेक बिजनेसमा एफ वान सफ्ट अगुवा कम्पनी हो ।

कम्पनीको कूल आम्दानीको ९८ प्रतिशत हिस्सा उत्पादन र सेवाहरूको बिक्रीबाट भएको छ । दूरसञ्चार कम्पनीको डिजिटल टपअप र बल्क एसएमएस सेवा समावेश छ ।

पछिल्ला वर्षमा फिन्टेक डोमेन (बहु सहायक कम्पनीमार्फत) एफ वानको उपस्थिति बढेको छ । समूहभित्रको सबैभन्दा पुरानो कम्पनी डिजिटललगायत समूहका अधिकांश कम्पनीमा प्रत्यक्ष र अप्रत्यक्ष लगानी भएको वालेट र भुक्तानी गेटवे सेवा छन् ।

टेलिकम कम्पनीहरू र इन्टरनेट सेवा प्रदायकलगायतका डिजिटल टप अप र एसएमएस सेवाको थोक व्यापारमा एफ वान सफ्टअन्तर्गत उत्पादन र सेवाको बलियो ग्राहक आधारलाई ध्यानमा राखेर यसले नेतृत्वको स्थान प्राप्त गरेको छ ।

एफ वानसँग फिनटेक स्पेक्ट्रमभरी काम गर्ने धेरै सहायक र सहयोगी पनि छन् । डिजिटल वालेट कम्पनी इसेवा लिमिटेड, पेमेन्ट गेटवे कम्पनी फोनपे पेमेन्ट सर्भिस लिमिटेड र प्रविधि आधारित अन्य कम्पनीहरु छन् । कम्पनीको अध्यक्ष विश्वास ढकाल हुन् उनी एफ वानमा ३५ प्रतिशत स्वामित्वसहित प्रमुख सेयरधारक पनि हुन् । एफ वान सफ्टको स्थापना सन २००४ मा भएको हो ।