काठमाडौं । सिटिटेक ग्रुप प्रा लिले एकीकृत भुक्तानी संयोजन प्रणाली तथा व्यवसायी व्यवस्थापन सफ्टवेयर ‘गेटपे’ लाई नेपाल क्लियरिङ हाउस लिमिटेडसँगको सहकार्यमा माछापुच्छ्रे बैंक लिमिटेडमा सफल भुक्तानी तथा व्यवस्थापन शुभारम्भ गरि ऐतिहासिक उपलब्धि हासिल गरेको छ।

सिटिटेक ग्रुप डिजिटल भुक्तानी प्रणालीमा क्रान्तिकारी परिवर्तन ल्याउने संस्थाको रुपमा आफ्नो पहिचान स्थापित गरेको छ। यस संस्थाले हाल सम्म फिन प्रो तथा फिन पस जस्तो नवीनतम सफ्टवेयर ल्याएर नेपालमा पहिले नै आफ्नो वर्चश्व कायम गरिसकेको छ।

हाल संचालनमा आएको गेटपे बैंक तथा वित्तीय संस्थाहरूलाई एकीकृत भुक्तानी प्रणाली मार्फत भुक्तानी संरचना सरल बनाउने, व्यवसायी व्यवस्थापन गर्ने र नयाँ भुक्तानी माध्यमहरूलाई छोटो समयमा एकीकृत गर्न सक्षम बनाउने प्लेटफर्म हो।

व्यवसायीहरुका लागि यो प्लेटफर्मले सबै कारोबारहरूको एकै स्थानबाट अनुगमन गर्ने, सुविधा दिने तथा फरक भुक्तानी प्रणालीहरूलाई एकीकृत प्रणालीमा समायोजन गर्नेछ। आधुनिक प्रविधि मार्फत वास्तविक समयमै कारोबार पूरा गर्ने क्षमताले गेटपेलाई अधिक कार्यकुशल, लागत प्रभावी र डिजिटलमैत्री साधन बनाएको दाबी जनाइएको छ।

एकै पटकमा धेरै भुक्तानी माध्यममा गेट्पेको पहुँच स्थापना हुने हुदाँ जटिल भुक्तानी प्रणाली सहज हुने बताइएको छ। यो प्लेटफर्मले फरक भुक्तानी गर्ने माध्यमहरुलाई लागत प्रभावी र भरपर्दो च्यानलमार्फत गतिशील रूपमा पठाउने सुविधा प्रदान गर्छ। प्रयोगकर्तालाई छिटो, सजिलो र सहज भुक्तानीको अनुभव प्रदान गर्दछ। यसको नौलो प्रविधि संरचनाले बैंकहरूलाई नयाँ भुक्तानी माध्यमहरु एकीकृत गर्न र बदलिंदो बजारको माग अनुसार सेवा प्रदान गर्न यसले मद्दत गर्छ।

माछापुच्छ्रे बैंकले गेटपेलाई आफ्नो दैनिक संचालनमा सफलतापूर्वक समावेश गरिसकेको छ। यस प्लेटफर्मद्वारा बैंकका सम्पूर्ण भुक्तानी प्रणाली सहज गर्ने अभिन्न अंग बनेको जनाइएको छ। माछापुच्छ्रे बैंकको डिजिटल बैंकिङ टिमका अनुसार गेटपेको माध्यमबाट व्यवसायीसँग सम्बन्धित सम्पूर्ण कारोबार र भुक्तानीहरू एकै ठाउँबाट हेर्न सक्ने सुविधा भएको छ। यसले बैंकको कार्यकुशलता अभिवृद्धि गर्नुका साथै ग्राहकलाई प्रदान गरिने सेवा अझ सरल र सबल बनाएको उनीहरुले बताएका छन्।

यस्तै, नेपाल क्लियरिङ हाउस लिमिटेडका प्रतिनिधि अनुसार यस साझेदारीमा सहभागी हुन पाएकोमा उत्साहित भएको भन्दै गेटपेले बलियो एकीकृत भुक्तानी पूर्वाधार निर्माण गरि नेपाललाई अन्तराष्ट्रिय फिनटेक बजारमा एउटा कोशे ढुंगा सावित गर्न सक्ने विश्वास लिएको जनाइएको छ।

साथै यस कार्यक्रम बारे सिटिटेकका प्रमुख कार्यकारी अधिकृत साजन शर्माले भने,’नेपाली बैंकहरूलाई एकीकृत भुक्तानी प्रणालीलाई सशक्त बनाउने नवीनतम प्रविधि प्रदान गर्ने दिशामा ऐतिहासिक नयाँ पाइला चालेका छौं। अबका दिनहरुमा नेपालका बैंक तथा बित्तिय संस्थाहरुको भुक्तानी व्यस्थापन तथा संचालनमा हाम्रो संस्थाको तर्फबाट अझै उलेख्य योगदान हुने विश्वास दिलाउँछौं।’